Vawk phûm nan YMA-in ram hmantir

Champhai District Committee on African Swine Fever & Other Transboundary Animal Diseases chu chairman James Lalrinchhana, DC hoin nimin khan DC conference hall-ah an ṭhukhawm a, African Swine Fever (ASF) vanga vawk thi phûmna nei lote tan YMA Sub-Headquarters, Champhaiin ram an hman hawhtir thu tarlan a ni.

Ṭhutkhawmah hian, ASF vanga vawk thi a awm belh zel avangin phûmna hmun nei loa harsatna thleng mek leh vawk phûmna tur hmun dilna lut pakhat a awm thu an sawi a; vawk thi phûmna nei lo tan Champhai Sub-Hqrs YMA-in Keifangtlang, Hmunhmelṭha kawnga an ram hman hawh an phal thu leh an lawm thu an tarlang. A hmunhma cheibawl dan turte a hmunah kalin an enfiah nghal a, JCB hmangin vawk phûmna tur an lai nghal a ni.

AH&Vety department tarlan danin, Champhaiah hian May 9, 2021 khan Zokhawtharah ASF vei hmuh chhuah a ni a, ASF lêng thawh khatna chhungin vawk 548-in thihpuiin, October 2021 khan ASF vanga vawk thi hnuhnung ber report a ni.

ASF leng thawh hnihnaah February 4, 2022 khan Champhai Electric Veng aṭangin report a ni a, khua/veng 12 chu ASF hri lenna hmun infected area-ah puan a ni tawh.