April 12, 2021 hnua hripui vei tlem lai ber

May 9, Thawhṭanni khan Mizoramah Covid-19 vei mi 25 hmuh chhuah a ni. Nimin khan hripui vei dam tawh mi 34 chhuahtir an ni a, April 12, 2021 hnua Covid-19 active case tlem lai ber a ni mek. Hripui vanga thi an awm lo a, a záwnin ni riat chhung thi an awm tawh lo.

Thawhṭannia Covid-19 vei hmuh tharte chu mipa 13 leh hmeichhia 12 an ni a, RAT hmanga hmuh vek niin, positivity rate chu 5.48% a ni. Swab sample endikna hmanraw danga endikte a negative vek.

Ni riat chhung a záwnin Mizoramah Covid-19 vanga thi an awm tawh lo a, thi an awm hnuhnun ber chu May 2, 2022 kha a ni.

IDSP record angin, Mizoramah Covid-19 vei 2,27,761 hmuh chhuah a ni tawh a, mipa 1,06,057 leh hmeichhia 1,21,704 an ni a, mipa aiin hmeichhia 15,647-in an tam zawk. Nimin tlai dar 5 thleng khan mi 2,26,897 (99.62%) chhuahtir an ni tawh a, mi 697 (0.31%) thi tawhin, enkawl mek mi 167 (0.07%) an awm.

Nimin tlaia Covid-19 vei enkawl lai mi 167 chiah awm chu kum khat chuang hnua hripui vei enkawl lai an awm tlem ber lai a ni a, April 12, 2021 tlai khan active case mi 139 an awm a ni.

Mizorama district zawng zawngah hripui vei inenkawl lai mi 50 awm tlinna a awm rih lo a, enkawl lai tamna ber Saitual district-ah mi 47 an awm. Siaha leh Lawngtlai district-ah positive an awm rih lo a; Hnahthial, Champhai, Kolasib leh Khawzawl district-ah positive enkawl mek mi 10 aia tlem ṭheuh an awm mek.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,761 chu mi 1,000 zelah hripui vei mi 207 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.