MBOCWWB-in dan loin sum a pe chhuak ; NIAS, Kolkata zir chian hmasak a ni lo

Mizoram Building and Other Construc­tion Workers Welfare Board (MBOCWWB) chuan an sum neihte dan loin an hmang a, dan loa sum an hmanna zingah Nalanda Institute of Advance Studies (NIAS), Kolkata hnena Mizo zirlai 32-te zirna senso atana sum an pek pawh a tel. Distance education/open university (NIAS, Kolkata)-a zir tura Mizo zirlaite tirh an nih hmain zir chianna a awm lo.

RTI Act hmanga zawhna Labour, Employ­ment and Industrial Training (LEIT) depart­ment SPIO-in a chhannaa a lan danin, zirlaite senso atan MBOCWWB hian sum a hmang thei a, mahse, MBOCWWB-a inziak lut fate tan chauha hman theih a ni.

NIAS, Kolkata-a zir tura Mizoram sorkarin Mizo zirlai 32 a tirhte zirna senso atan MBOCWWB sum Rs. 1,28,19,200 hman a ni a, kum thum chhunga an zirna senso atan ṭum thumah pek tlak niin, kum 2014-a August 5, September 15 leh September 16-ahte pek a ni.

MBOCWWB hian an Secretary hming NIAS, Kolkata Chairman hnenah August 5, 2014-ah Rs. 66,09,900, September 15, 2014-ah Rs. 4,40,660 leh September 16, 2014-ah Rs. 57,68,640 a pe.

NIAS, Kolkata-a Mizo zirlai 32-te chu MBOCWWB-a inziak lut fate an nih vek leh vek loh zawhna chu, "NIAS-a zirlaite hi MBOCWWB-a inziak lut emaw, an fate an ni vek lo," tia chhàn a ni a; MBOCWWB-a inziak lut lo emaw, inziak lut fate ni lote lehkha zirna senso atana MBOCWWB sum hman phal a nih leh nih loh zawhna pawh, "Phal lo" tia chhàn a ni.

NIAS, Kolkata-ah Mizo zirlaite tirh an nih hmain an course chu distance education (open university ang) a ni tih sorkarin a hriat leh hriat loh zawhna chu, 'Hre lo' tia chhàn a ni a; distance education a ni tih sorkarin a hriat lâwk loh chhan leh zirchian hmasak a nih leh nih loh zawhna chu, 'Zirchianna a awm lo niin a lang' tia chhàn a ni bawk.

MBOCWWB hian Emporium Training and Consultancy Pvt. Ltd, Kolkata hnenah Mizo zirlaite zirna senso atan Rs. 2,71,08,136 leh Best First Step Education Pvt.Ltd Quality Skill Training, Guwahati-a senso atan Rs. 73,98,000 a pe tawh bawk a; NIAS, Kolkata nen institution pathum hnena sum a pek tawh zat chu Rs. 4,73,25,336 a ni.

Emporium Training and Consultancy, Kolkata hnena MBOCWWB-in sum pek dan chu - April 10, 2014-ah Mizoram Youth Commission (MYC) Sedcretary hnenah Rs. 48,44,928 , June 11, 2014-ah MYC Superintendent hnenah Rs. 48,44,928, August 19, 2014-ah MYC Superintendent hnenah 48,44,928, September 8, 2014-ah Rs. 68,20,000, March 9, 2015-ah Rs. 46,02,682 leh July 9, 2015-ah Rs. 11,50,670-te a ni. He zirna in hi LEIT nen MoU an ziak a, LEIT aiawha hming ziaktu chu director Rotluanga a ni.

Best First Step Education hnenah chuan kum 2014-ah vek sum pek a ni a; an pek dan chu - July 214-ah Rs. 25,00,000, August 19-ah Rs. 23,36,000, August 19-ah MYC Superintendent hnenah Rs. 15,58,000 leh November 17-ah Rs. 10,04,000-te a ni. Best First Step Education hi MYC nen MoU an ziak a, MYC aiawha hming ziaktu chu JT Vanlalngheta a ni.

Hetih lai hian, MBOCWWB hian mimal pali hnenah loan a pe tawh. LEIT Director PA hnenah Rs. 15,00,000 pûktir a ni a, PA hian rulh a la nei lo. ITI Principal hnenah Rs. 20,39,000 pûktir a ni a, ani hian Rs. 15,87,000 rûl tawhin, Rs. 4,50,000 a la bá. Mizoram Youth Commission (MYC) Secretary hnenah Rs. 15,00,000 pûktir a ni a, ani hian Rs. 5,00,000 rûl tawhin, rulh hmabak Rs. 10,00,000 a la awm. LEIT Director hnenah Rs. 1,99,000 pûktir a ni a, ani hi chuan a rûl zo vek tawh thung.