Mt. Carmel School zirlaite'n Sikul an inkai chhâwk dawn

Mount Carmel School, Chaltlang chuan Inrinni zing khawvar hmaa an sikul a kan avangin zirlaite sikul kai hun tur an siam rem a, pawl hrang hrangte chu sikul an inkai chhâwk dawn. Sikul kâng ral ta hlut zawng hi cheng nuai 35 vela chhût a ni.

Mt. Carmel School, Assam type in hi Inrinni zing dar 1:30 leh 2:00 inkar vel khan a kâng a, bungrua chuh hman lohin a kâng ral. A bul vela in kâng kai tur erawh vèn a ni. Sikul neitu Lalnunkunga Sailo sawi danin, sikul in kang hi chhawng thum niin, pawl 7-10 te class room 11 leh zirtirtu room pakhat a awm. Pawl 7-10 ah hian zirlai 750 an awm a ni. Lalnunkunga Sailo hian an sikul kan chungchangah hian Bawngkawn Police Station-ah FIR a thehlut.

Sikul a kan vek avang hian Mt. Carmel School hotute chuan zirlaite sikul kai hun tur an siam rem a; pawl 1-7 inkarte leh pawl 10 zirlaite chu Thawhṭanni, Nilaini leh Zirtawpniah sikul an kal ang a, pawl 8, 9 leh 11-te chu Thawhlehni, Ningani leh Inrinni-ah sikul an kal ang.