Rs. 2,00,000 chuang hû heroin hâl
Aizawl khawpui lailía veng pangaa YMA intélkhawmte'n heroin an man sa Rs. 2,00,000 chuang hû chu Inrinni khan Dawrpui School kawtah Saron Veng Local Council chairman Chuauhluna'n a hâl ral.
Veng pangaa YMA duty-te hian September 3, 2016 aṭanga January 21, 2017 thleng khan ruihhlo kaihhnawih leh sualna dang vangin mi 1,146 an khawm tawh a; chung zinga mi 148 chu home-ah dahin, Police leh Excise & Narcotics kutah mi 13 leh Child Welfare Committee hnenah mi pathum an hlan tawh.
Heroin hawng 34, cane 287 leh chhinsen 54 an man tawh a; Alprozolam leh a tlukpui ruihhlo mûm 3,187, khuh damdawi bûr 4,751, sapzu leh rakzu tam tham tak, ganja leh opium tam tham tak an man tawh bawk.
Ruihhlo an man tawh zawng hlut zawng chu Rs. 31,81,035 a ni a; an hmalakna atan ṭanpuina Rs. 3,00,875 an dawng tawh a ni.
Joint YMA duty chairman Vanlalsawma chuan, Aizawl New Market leh a chhehvela veng pangaa ruihhlo leh a kaihhnawih thil leh, rûkrûk leh sualna dang vengin an thawk tih a sawi a; ruihhlo kaihhnawiha an man mi ṭhenkhatin harsatna an neih pawh-in kohhran, pawl leh mimalte thawh khawm hmangin damdawi-inah hruaiin, a tul chuan an admit ṭhin niin a sawi bawk.