KHAWTHLIR

Lawngtlai West bialtu MLA C Ngunlianchunga chuan nimin khan Lawngtlai district-a hman turin Chief Medical Officer hnenah ambulance a pe. C Ngunlianchunga hian CMO hnenah hian ambulance bakah, personal protective equipment 50, face shield 600 leh Rs. 50,000 a pe a; Lawngtlai DC hnenah Rs. 2,00,000 leh Central YLA hnenah Rs. 1,50,000 a pe bawk.

Ramthar North Branch KTP chuan nimin khan thisen pek rûnpui an huaihawt a, Aizawl Civil Hospital tan thisen unit 77 an pe a, petute mipa 52 leh hmeichhia 25 an ni.

Aizawl South-II bialtu MLA Lalchhuanthanga chuan nimin khan Zoram Medical College (ZMC)-ah insûkna khawl (washing machine) a hlân. MLA hian nimin vek khan Hlimena quarry chim chu a hmunah a tlawh a, chhanchhuah hna thawktute thingpui man atan Rs. 3,000 a pe a ni.

Kolasib District Board Safety Monitoring team ruahman anga ramri venga duty tur Kolasib Venglai Branch YMA leh College Veng Branch YMA member-te chu nimin khan DC pisa tual aṭangin SDO(S) Vanlalchhuanawma Chawngthu-in a vailiam. Kolasib Venglai YMA member-te hi Bukvanneiah an duty dawn a, College Veng YMA member-te chu Saihapui-K ah an duty thung dawn a ni.

Lunglei District Child Protection Unit-te chuan Covid-19 dona hmanrua PPE set 30, disinfectant litre 150 leh naupang infiamna leh eitur Lunglei District Level Task Force hnenah an hlan.

Hnahthial District Level task Force (DLTF) chairman, DC Vanlalmawia hoin DLTF leh Village Level Task Force hruaitute chu DC conference hall-ah an ṭhukhawm a, inkharkhip thawh 7-na a inkaihhruaina tura ruahmanna awmte an thlirho.