KHAWTHLIR

KTP conference
Kristian Ṭhalai Pawl (KṬP) pastor bial hrang hrangte chuan January 20, 2017 aṭanga nimin thleng khan Bial Conference an hmang a, nizan khan a ṭiak. KṬP Bial Conference-ah hi Zirtawpni zanah ṭan a ni a, Inrinni khan rorel inkhawm neih niin, pastor bial chhung leh ram pum huap thil chi hrang hrang an rel a ni. Nikuma KṬP General Conference-a report ang chuan, pastor bial 197-ah KṬP branch 831 a awm a, member 1,43,657 (mipa 90,239 leh hmeichhia) an awm.

Search Committee
Zirlai pawl pahnih - MZP leh MSU chuan Nalanda Institute of Advance Studies (NIAS) Kolkata-a Mizo zirlaite'n harsatna an tawh chungchangah thu dik tak hriat a nih theih nan a zir chiangtu tur Search Committee an din. Search Committee chu January 25, 2017 tlai dar 3-ah an thil hmuh leh hriatte report tura tih an ni.

Special camp
Inrinni khan Mamit Bazar Veng V/C House-ah National Voters Day, 2017 pualin Special Camp buatsaih a ni. He hunah hian vote nei thei tawh, electoral roll-a hming la awm lote tan awlsam zawka electoral roll-a an inziah luh theih dan tur hrilh an nih bakah, election kaihnawiha thil hriat fiah loh leh hriat duhte inhrilhhriatna hun hman a ni.

Karate zirna khâr
Lawngtlai DC bultuma Nehru Yuva Kendra (NYK), Lawngtlai leh Lawngtlai Electric Veng Branch MHIP ṭangkawpin sikul chawlh hun âwl hnawh khah nana naupangte tana karate zirna an buatsaih chu Lanwgtlai District Sports Centre-ah January 20 khan khâr a ni. Karate zirna hi December 16, 2016-ah ṭan a ni.

Minister-in hawng
All Mizoram Farmers Union (AMFU), Lunglei district headquarters office leh Hrangchalkawna kut hnathawktute tana din Eastern Rural Institute and Research Centre chu January 20 khan Agriculture minister R Lalzirliana'n a hawng.