Mizorama gas phurh luh a kal tluang

Mizorama ei rawngbawlna gas phurtu truck-te'n gas phurh man an hmuh ṭhat loh vanga harsatna an tawh hnuah, tun hnaiah Indian Oil Corporation (IOC) aṭanga sum hmuh a nih avangin dan pangngaiin gas phurh luh a ni leh tawh. Tun dinhmunah Mizoramah gas harsatna a awm hriat a ni lo.

Food, Civil Supplies and Consumer Affairs (FCSCA) secretary Dr Franklin Laltinkhuma chuan, ei rawngbawlna gas phurh man chu FCSCA department pek tur ni loin IOC pek tur a nih thu leh, Supply department chu a buaipuitu mai an nih thu a sawi.

Dr Franklin Laltinkhuma chuan, gas phurh man atana Mizoram sorkarin pawisa a pek ve tur chu truck neitute nen contract siam tirhah pek tlak nghal a ni tih a sawi a; tun hnaia gas phurtute'n an phurh man IOC aṭanga an hmuh ṭhat loh chungchang chu IOC hotute an sawipui hnuah Supply department account-ah dah luh nghal a ni a, chu chu a phurtute hnenah pek chhuah nghal a nih thu a sawi bawk.

Thu dawn danin, gas phurh man hi IOC-in thla hnih vel an pek loh avangin January 2017 thla tìr lam khan gas phurtu truckte-'n gas an phur ṭha duh lo hman a ni.

Supply Secretary sawi danin, ei rawngbawlna gas hi December 2016 khan a thleng ṭha thawkhat a; Borkhola, Assam aṭangin bûr 82,206 leh Mualkhang Bottling Plant aṭangin bûr 85,431, a vaiin bûr 1,67,637 hmuh a ni. Gas phurtute'n Krismas leh kum thar chawlh an hman avangin December 23-31, 2016 chhung velin Mizoramag gas a thleng ṭha lo deuh a; tunah erawh chuan gas phurh man an hmuh tawh bawk avangin gas-ah harsatna a awm rih loa ngaih a ni.