Mizo Traditional Games khâr

Aizawl district tana Thingsulthliah khelmuala ni hnih awh Mizo Traditional Games 2017 buatsaih chu Inrinni khan khâr a ni a, Home minister R Lalzirliana'n a hmanpui.

R Lalzirliana chuan, pipute infiamna leh lâmte chu ṭhangtharte'n an hriat a, an thiam a pawimawh tih sawiin, "Kan pipute nun ze mawi tak, an tlawmngaihna leh huaisenna te, aia upa an zahna leh hmeichhia leh hmeithaite thlamuantu an nihna kha kan vawng nung reng tur a ni," a ti.

Infiamna lam reng reng chu taksa leh rilru hrisel siamtu a nih bakah, infiammiteah inunauna ṭha tak siamtu a nih thu sawiin R Lalzirliana chuan, "In­fiamna hmangin eizawnna ngêlnghet a neih theihzia kan Mizo ṭhalai I-league player-te aṭang hian a chiang hle a ni," a ti a; ṭhalaite chu inelna hlawhtling tak neih theih nana thâ an thawh avangin lawm­thu a hrilh.

Traditional Games hi Ministry of Tribal Affairs hnuaia Vanbandhu Kalyan Yojana (VKY) hmalakna kaltlanga Mizoram Sports & Youth Services department buatsaih a ni a; inbuan, insuknawr, insaihruipawh, kalchhet intlansiak, ketaminu intlansiak, kawi inkahsiak, sairawkherh inperhsiak leh arpa insual­ah inelna neih niin, a ti ṭha pathum ṭheuh hnenah lawmman hlan a ni.