Health dept. audit-ah politics a tel lo - Finance Commissioner

Finance commissioner Vanlalchhuanga chuan, Covid-19 dona atana Health department sum hman dan endik (audit) a nih chungchangah politics thil a awm loh thu thuthar thehdarhtute zawhna chhángin a sawi. Finance Commissioner hi nimina Health Minister-in thuthar thehdarhtute a kawmnaah a tel ve a ni.

Audit chi hrang hrang a awm thu sawiin Vanlalchhuanga chuan, "Accountant General lam chuan external audit an ti ṭhin. Tuna Health department audit hi chu internal audit a ni a, a authority Finance department a ni em tihte a awm. Department-te hi audit vek tur an ni a, thawktu indaih lohna avangin kan audit thei lo zawk a ni," a ti.

Finance Commissioner chuan, Covid-19 dona atan Health department chuan hmun hran hran aṭangin sum an hmuh thu sawiin, "Nakinah AG lamin an audit huna an buai lohna atana tih a ni. Political motive thil engmah a awm lo a, invènpuina thil a ni," a ti a; AG-in external audit a tih chuan a kawng a thui avangin, tuna audit chuan inpuahchahna hun a siamsak tur thu a sawi.

Disaster Management & Rehabilitation department leh Home department sum hman dan audit ve phût an awm chung­changah Finance Commissioner chuan, "Home bikah chuan pawisa an dil belhna tlangpui chu POL leh TA/DA atan a ni a, audit tham a awm lo. DMR pawh an sum hmanna hlawm bungraw leinate chu Health-ah an pe chhâwng a ni. Chu bakah, DMR hi AG-in an audit lai a ni a, chutih laia lo audit ve chu a kal hmang lo," a ti.