Stamp Act atan Valuation Committee din Kuminah hman theih kan beisei - Revenue Minister

The Indian Stamp (Mizoram Amend­ment) Act, 2016 hnuaia ram hlutna chhût dan tur duang tur Valuation Committee din a ni tawh. Hetih lai hian, Land Revenue & Settlement (LRS) minister R Romawia chuan, Stamp Act thar chu kumin chhunga hman ṭan theih a beisei a nih thu a sawi.

Vanglaini palai zawhna chhangin LRS Minister chuan, "Valuation Committee hi district tinah din a ni tawh a, committee hian hna an thawk ṭan tawh. Anni hian ram hlutna chhût dan tur duangin, rawtna an neihte sorkarah an thlen ang a, an rawtnate hi sorkarin a zir chian hnuah dan thar hi hman theih a ni ang," a ti.

R Romawia chuan, The Indian Stamp (Mizoram Amendment) Act, 2016 chu Valuation Committee din a nih hmaa hman ṭan a nih vanga suspend a nih thu sawiin, "Hman leh thuai chu kan duh a, mahse, thawktu indaih lohna vangtein duh angin a kalpui chak theih loh a ni," a ti a; kumin chhung chuan hman theih a nih a beisei thu a sawi.

The Indian Stamp Act chu Mizoramah siam remin kum 1997 aṭangin The Indian Stamp (Mizoram Amendment) Act, 1996 hman ṭan a ni a; he dan hi kum 2007 khan tihdanglam niin, stamp duty atan ram hlutna (market value) aṭanga chhûta 0.5% lak a ni ṭhin. Dan hi tihdanglam leh niin, Assembly chuan The Indian Stamp (Mizoram Amendment) Act, 2016 chu March, 2016 khan a pawm.

The Indian Stamp (Mizoram Amendment) Act, 2016 hi rules siam a nih hma leh ram hlutna chhût dan tur duang tur, Valuation Committee din a nih hmain hman ṭan a ni a; dan thar hnuaiah hian stamp duty chu a lêt thumin a pung.

Dan thar hi September 1, 2016-a hman ṭan turin sorkar gazette chhuah a ni a, mahse, department chuan chhiah lak tur punna a tam avangin an hmang lawk lo a, September 2016 thla laihâwlah hman ṭan a ni. Dan siamṭhat tâk ang chuan, stamp duty atana market value aṭanga 0.5 lak ṭhin chu 2%-ah tihpun a ni a, a lêt thumin a pung a ni.

Sorkarin April 18, 2016-a notification a tihchhuaha a lan dan chuan, Valuation Committee-ah hian Inspector General of Registration and Commissioner of Stamps ruat tur a ni a; Valuation Committee hnuaiah district leh sub-district tinah Market Valuation Sub-Committee din tur a ni bawk.

MNF-in Mizoram sorkarin stamp duty leh fee dangte a tihpun tihniam an phût avangin MNF ṭhalaite chuan October 24, 2016 khan Land Revenue & Settlement Directorate-a pisa kai turte an lo dang tawh.

October 24, 2016-ah vek Revenue minis­ter R Romawia hoin MNF ṭhalaite thil phût chu ngaihtuah nghal a ni a, tlai dar 3 velah meeting thuchhuak LRS Director-in a puan hnuah MNF ṭhalaite chu an ṭîn darh a ni.

Revenue Minister hoa thutlukna an siam dan chuan, The Indian Stamp (Mizoram Amendment) Act, 2016 hmanga July 1, 2016 aṭanga chhiah lak tura tih chu sût a ni. Stamp duty chu kum 2007 rate anga lak leh tur a ni a, a man sanga lak tawhte chu ngaihtuah nawn leh tura tih a ni.

Hetih lai hian, a man sang zawka chhiah lak tawhte pek let a nih dawn leh dawn loh chu nimin thleng khan ngaituah a la ni lo a, LRS Minister chuan pek let leh a buaithlak tawh tur thu Vanglaini a hrilh.