ZNP-in MYC Chairman pisa an kalhsak

Zirna in lem (fake institution) nia hriat, Na­landa Institute of Advance Studies (NIAS), Kolkata-a Mizo zirlai 32 tirh ZNP ṭhalaite chuan nimin chawhma khan Mizoram Youth Commission (MYC) chairman T Sang­kunga, MLA pisa kawng­khâr an kalh a, police-te'n an hawng leh nghal. ZNP ṭhalaite hian MYC Chairman chu báng turin an phût nawn.

ZNP ṭhalai president Lalmuanpuia Punte chuan, nimin khan an party pisa-ah thuthar thehdarhtute a kâwm a; zirna in lem NIAS, Kolkata-ah Mizo zirlai 32-te tirh an nih avangin an hma lam hun tihchhiat a ni tih sawiin, "MYC Chairman-in mahni inthiar fihlim a, a awmna party sorkara minister Lalrinmawia Ralte hnena ball a béng per ringawt hi a dik lo. NIAS-a zirlai 32 tirhnaah hian MYC hi inthiar fihlim thei a ni lo a, MoU-ah chiang takin a lang a, MYC/WWB tih vekin a inziak a ni," a ti.

Lalmuanpuia Punte sawi danin, ZNP ṭhalai hruaitute chu nimin chawhma dar 10:30-ah MYC pisaah kalin, thil awmzia sawipui an tum a; mahse, MYC Chairman leh officer-te an lo awm loh avangin an dinna ngai, MYC chairman T Sangkunga chu báng turin an la phût reng tih lantir nan MYC Chairman pisa kawngkhar chu dar 10:45-ah an kalhsak a ni.

ZNP ṭhalai President chuan, "Mizo zirlai 32-te hma lam hun kal zel tur beidawnga an siam tawh hnu pawha hrehawm tia inchhîrna reng reng nei lo leh mawhphurhna la duh loa MYC Chairman-in thu a la sawi cheu hi a vanduaithlak a, 'Báng rawh se' tih hi kan dinna ngai reng a ni," a ti.