MPC-in mobile campaign neih zel an tum

MPC party office bearer-te chu nimin khan an pisaah an president Lalhmangaiha Sailo hoin an ṭhukhawm a; kum 2016-a Aizawla mobile campaign an neih tawh chu chhunzawm zel an rél a, "Mizorama khaw hrang hrangah campaign beihpui thlâk ni se," an ti.

MPC chuan, an president hlui Brig. T Sailo kaihhruai PC sorkar laia ṭhalaite hamṭhatna tura hmalakna kalpui tawh, a bikin ṭhalai lehkhathiamte'n mahni ram chhung ngeia an thiamna leh theihnate hmanga hnianghnâr taka hna thawh neia an intun nun theihna tur chu Congress leh MNF party-te'n sorkarna an chelh chhungin an hlamchhiah niin an tarlang a; chuvang chuan ṭhalai tam tak beidawngin an awm mek niin an sawi.

Tun hnaiah Mizoram sorkarin ruahmanna leh inbuatsaihna ṭha a kalpui loh vanga Mizo ṭhalai 32-te'n NIAS, Kolkata-a harsatna lian tak an tawk chu pawi an tih thu sawiin, MPC chuan, "Hei hian Mizoram sorkarinṭhalaite hmakhua a ngaih tâwk lohzia leh fimkhurna a tlâkchhamzia a tilang chiang hleah kan ngai," an ti.

MPC chuan, Congress sorkar hmalakna bera an sawi NLUP/NEDP chu hleihluak taka an party mite duhsakna leh Mizo hnam tana thil pawi ber, inthliarna ṭha lo tak thlentu nia sawiin, "Congress policy leh porgramme-te hi kan ram leh mipui hmasawnna leh dinchhuahna atan a beidawnthlak em em a. MNF pawhin kal ngaihna thar hre chuang loin Congress ang bawkin SEDP hmangin mipui an vehthlêm mek a ni," an ti a; Zoram mipuite chhanchhuak a, kawng dik zawhpui turin MPC party-in hma an lak zel dawn thu an tarlang.