Asst professor post ruak hnem
Mizorama sorkar college hrang hrangah assistant professor post 100 chuang a ruak a, hei vang hian college tam takah zirtirtu an indaih loh thu Higher & Technical Education (HTE) department hotute chuan Vanglaini an hrilh.
HTE department hotute hnen aṭanga thu dawn danin, sorkar sum indaih loh vangin college zirtirtu post ruakte chu hnawhkhah theih a ni hrih lo. Hei vang hian part time-in lecturer thla khata Rs. 20,000 hlawhin rawih ṭhin a ni a; mahse, part time lecturer pawh hi mamawh khawp lakna tur sorkarin a pe thei lo a ni.
Assistant professor indaih lo chungin college luhna nei lo an awm lohna atan theihtawp an chhuah tih sawiin HTE hotute chuan, "College kal lo an tam chuan ramin a tuar dawn si a, college lamin seat an neih tawh loh thu an sawi hnuah pawh zirlai admit hram turin kan ngen ṭhin," an ti.
HTE department hotute chuan Mizoramah university din dil eng emaw zat an awm tih sawiin, "Dilna rawn thlente hi an hmunahte zir chian a ni ṭhin," an ti a; mahse tun dinhmunah chuan sorkarin university din belh ṭul a la tih hrih loh thu an sawi.