KHAWTHLIR

Lei dawhna tur pe
Canara Bank chuan Armed Veng leh Ramthar Veng inrìna, Theihai lui chunga kea kalna lei (RCC bridge) dawh nan corporate social responsibility (CSR) aṭangin Rs. 10,81,000 an pe. Lei dawhna tur sum hi Canara Bank deputy general manager Nagesh G Vaidya chuan Aizawl DC hnenah a hlân a; Aizawl DC pisa chuan lei hi a rang thei ang bera dawh tur a nih thu a tarlang.

Cashless transaction zirho
Ruchi Soya Industries Ltd.-a Oil Palm Division leh State Bank of India, Lunglei Chanmari Branch chuan nimin khan Lungleia Agriculture conference hall-ah Lunglei district chhunga oil palm chíngtute tan, sorkar laipuiin Digital India a kalpuinaa awlsam zawka lo neitute'n bank kalphung leh a dawr dan an hriat theih nan inzirtirna hun, 'Awareness seminar for familaring farmers on cashless transaction and digitilization' an buatsaih.

Tlan phal lo
Traffic SP C Lalthanmawia chuan thupek chhuahin, Electric Venga Elim leh Chhinga Veng Bethani inkarah SIPMIU-in sewerage pipeline phûm hna an thawh dawn avangin chawhma dar 10 aṭanga tlai dar 5 thleng lirthei dah leh tlân phal a nih dawn loh thu a puang.

Drone khap
Aizawl Sub Divisional Magistrate chuan thuchhuah siamin, Republic Day-ah venhimna ṭha taka kalpui a nih theih nan Lammual, Raj Bhavan leh Chief Minister bangla chungah drone/aerial camera hman khap a nih thu a tarlang a, "Thupek bawhchhia an awm chuan an drone/aerial camera-te man emaw, kahthlaksak emaw a nih bakah, an chungah dan angin hremna lek a ni ang," a ti.

Mamit R Day rel
68th India Republic Day, 2017 Celebration Technical Committee, Mamit chu nimin khan addl. DC H Lianzela hoin a pisa-ah an ṭhukhawm a, a ṭum khatna atan department hrang hrangte'n an hmalakna leh hmasawnna mipui hmuh theih tura an pho chhuahna atan tableau siam ni se, an ti.