Mizoram sorkarin police TA/DA Cheng nuai 1067 chuang a bá

24th January, 2017

Mizoram sorkar chuan, Mizoram hmun hrang hranga police unit 24-a thawkte travelling allowance (TA) leh dearness allowance (DA) Rs. 1,06,74,057 a ba mek a; police-te TA/DA batsak hi tun dinhmunah pek tumna sorkarin a neih leh neih loh hriat a ni lo.

Vanglaini-in RTI Act hmanga Police headquarters (PHQ)-a a zawhna, PHQ-a SPIO-in a chhan danin, Mizoram police unit 24-te'n Mizoram sorkara TA/DA an lak theih, sorkarin a la pek loh cheng nuai 1067 chuangah hian unit hrang hrangah bill zat a inang lo hle a; bill nei tlem ber DIG(outhern Range)-in Rs. 39,750 chiah a neih laiin, 2nd. IR Battalion-ah chuan Rs. 1,76,46,044 a tling.

February 15, 2011 khan Finance department-a Additional Secretary chuan office memorundum a chhuah a, chu office memorandum ang chuan police-te'n TA/DA an bill ṭhin. Finance department-in TA/DA bill dan phung a siamah officer aṭanga a hnuai lam hlawh chi hrang pangaah ṭhen hran a ni a; grade pay Rs. 9,500, Rs. 7,600-Rs 8,900, Rs. 5,400-7,100, Rs. 4,200-Rs 4,800 leh Rs. 4,200-ah ṭhen a ni.

Dearness allowance (DA) an lak theih dan tarlanah chuan, grade pay Rs. 9,500 leh a aia tam late'n ni khatah hotel/guest house-ah ni khatah Rs. 5,000 thleng an hmang thei a, air conditioned taxi-ah km. 50 chin an hmang thei a, ni khatah Rs. 500 aia tam lo chaw ei manah an hmang thei.

Grade pay Rs. 7,600-Rs 8,900 inkar late chuan ni khatah hotel thlen man atan Rs. 3,000 thleng, AC taxi-ah km. 50 chin, ni khatah chaw ei nan Rs. 300 aia tam lo an hmang thei a; grade pay Rs. 5,400-7,100 inkar late chuan hotel thlen man Rs. 1,500 thleng, ni khatah taxi-ah Rs. 150 chin leh km. 50 chin, ni khatah chaw ei nan Rs. 200 aia tam lo an hmang thei thung.

Grade pay Rs. 4,200-4,800 late chuan hotel thlen manah ni khatah Rs. 500 thleng, vahvelna atan ni khatah Rs. 100 leh ei leh inah Rs. 150 aia tam lo an hmang thei. Grade pay Rs. 4,200 leh a aia hniam late'n thlenna man atan ni khatah Rs. 300 thleng, vahvelna atan Rs. 50 leh ei leh inah Rs. 100 aia tam lo an hmang thei bawk.

India ram hi khawpui leh khaw tê deuhte ṭhen hran a ni a; X-Cities-ah Delhi, Mumbai, Kolkata, Chennai, Bengaluru leh Hyderabad-te dah niin, Y-Cities-ah India ram khawpui lian hrang hrang 72 dah a ni a, chu'ng zingah chuan Shillong leh Guwahati a tel. X leh Y cities-ah dah loh zawng chu Z category-ah dah niin, 'ordinary places' tia tarlan a ni.

RTI Act hmanga zawhna chhannaah chuan, TA/DA bill la pek loh chu sorkar aṭanga pawisa hmuh ang angin a rang thei ang bera rulh ṭhin a nih thu an ziak a; tun dinhmunah sorkarin TA/DA a batsak rulh tumna a neih leh neih loh chungchanga zawhna chu an hriat loh thuin an chhang.

January 2017 thlenga sorkarin police unit hrang hrangte TA/DA bill a bat dan chu hetiang hi a ni.

Police Unit TA/DA
batsak zat
2nd. IR Battalion Rs. 1,76,46,044
4th. IR Battalion Rs. 1,49,60,167
1st. IR Battalion Rs. 1,04,09,455
1st. MAP Rs. 1,03,03,770
MPRO Rs. 78,66,666
5th. IR Battalion Rs. 75,75,887
Aizawl DEF Rs. 53,32,252
SP Security Rs. 40,10,825
2nd. MAP Rs. 38,58,907
Kolasib DEF Rs. 37,77,741
Mamit DEF Rs. 26,61,914
Lunglei DEF Rs. 25,96,208
Champhai DEF Rs. 24,37,736
Serchhip DEF Rs. 17,41,431
Lawngtlai DEF Rs. 16,90,580
CID (SB) Rs. 15,98,316
Police Training School Rs. 10,70,310
Siaha DEF Rs. 9,38,796
3rd. IR Battalion Rs. 6,47,591
3rd. MAP Rs. 4,66,069
CID (Crime) Rs. 4,43,379
Police Headquarters Rs. 2,97,281
Traffic Rs. 1,74,603
DIG (SR) Rs. 39,750
Total Rs. 10,67,40,578
* DEF hi District Executive Force tihna a ni