Fimkhur turin mipui chah

State Meteorological Centre chuan mipui fimkhurna tur thuchah an tichhuak a; Pa­thianni tlai leh nimin zingah lir a nghin avang leh ruahsur duh hun lai a nih avangin fimkhur turin mipui, a bikin leimin hlauhawmna hmuna awmte fimkhur turin an chah.

State Meteorological Centre chuan, June 21, Pathianni tlaiah ritcher scale 5.1-a náin Mizoramah lir a nghîng a, darkar 12 hnu, June 22 zing dar 4:10-ah ritcher scale 5.3-a ná lirnghing a awm zui leh tih an tarlang a, "Lirnghing a thlen hian a tìrah chhiatna nasa tak thlen kher lo mah se, ruahsurin a zui chuan chhiatna nasa zawk - leimin leh lei tawlh thleng thei a ni," an ti.

Regional Meteorological Centre (IMD), Guwahati aṭanga hmuh danin, June 22-27 chhung chu Mizoram hmun tinah ruahsûr tura rin a ni a, hmun ṭhenkhatah phei chuan nasa taka sûr tura hmuh a ni.

Meteorological Centre chuan, "Lìr a nghìn zawh hnu lawka ruahsur tura rin a nih avang hian, Mizoram chhung­ah leimin leh lei tawlhte awm thut thei a ni a, mipuite a theih ang anga lo inrálring tur leh fimkhur turin kan inngen a, leimin hlauhawmna hmuna awmte phei chu fimkhur zual turin kan inngen a ni," an ti.