Zenghri danna pek dan tur sawiho a ni

District Task Force on Immunization Committee chu nimin khan Champhai leh Ser­chhipah an ṭhukhawm a, January 31, 2017-a zenghri danna pek beihpui thlak dan tur an sawiho.

Serchhipah chuan District Task Force on Immunization hi Ser­chhip DC Dr Lalrozama hoin a pisa-ah an ṭhukhawm. Dr Lalrozama chuan, "India ram hi zenghri awm lohna rama puan ni tawh mah se, kan ṭhenawm ram aṭangtein he natna hi la rawn lut thei reng a. Mizoram hi Myanmar leh Bangladesh nena inrî leh mihring in­tlawhpawh tawn reng kan nih avangin zenghri hi rawn lang leh palh thei a ni," a ti.

Meeting-a tarlan dan­in, Serchhip district-ah hian zenghri danna pek tura ruahman chu mi 6,271 an ni a, a pekna hmun tur (booth) 71 siam a ni.

Champhaiah chuan District Task Force on Immunization hi DC conference hall-ah Champhai DC Vanlalngaihsaka hoin an ṭhukhawm a; naupang kum 5 hnuai lam zawng zawngte zenghri danna pek an nih theihna atan ruahmanna an siam a ni.