Hlawh nei loa thawk tur inpe an awm belh zel

Covid-19 laka invênna leh dona leh, hripui veite enkawlnaa a ṭul anga hlawh nei loa thawk tura inpe an awm belh zel a; chu'ngte chu an district hmunpuia sorkar hotute'n an hnathawh tur an ruahmansak ṭhin.

Nimin khan Lunglei chief medical officer Dr Thani Pachuau hnenah mi pathum an inpe a; chu'ngte chu - K Lalpianmawii, Lunglawn (B.Sc. MLT), Brandon C Lalthlengkima, Thingfal leh H Lalbiaksangi, Thingfal-te an ni. Mi pathumte hi Lungleia Health department hotute chuan nimin khan training an neihpui nghal.

Nimin vêk khan V Lal­hruaitluangi, Thenzawl Vengthar, laboratory technician chu thawktute a ṭul apianga pui turin Thenzawl damdawi-in (community health centre)-ah a inpe a ni. Samuel Lalrindika, Chhiah­tlang, health worker zir zo tawh chu a ṭul apiang thawk turin Serchhip CMO Dr Laldawngliana Sailo hnenah nimin khan a inpe bawk.

Lalremruata, Kawnpui Banglaveng pawh June 20, 2020 khan a inpe a, ani hi laboratory technician a ni.