NIAS, Kolkata-a Mizo zirlai tirhnaa Thil dik lo titute sorkarin hrem a tum

Labour Employment & Industrial Training (LEIT) secretary Benjamina chuan, Nalanda Institute of Advance Studies (NIAS), Kolkata-a Mizo zirlai 32 tirh an nih danah thil dik lo titute chu sorkarin a hrem dawn thu a sawi.

LEIT Secretary hian nimin khan Aizawl Press Club-ah thuthar thehdarhtute a kâwm a; NIAS, Mizoram Building & Other Constructions Workers Welfare Board (MBOCWWB) leh Mizoram Youth Commission (MYC) ten inremna thuthlung an siam chu dan lo a nih thu sawiin, "Sorkar aiawha inremna siam a nih dawn chuan sorkar aiawhin Secretary chinin hming an ziak tur a ni," a ti.

Zawhna chhangin Benjamina chuan, dan loa thil titute chu sorkarin a hrem dawn tih sawiin, "Hotu lu lam pawhin a mawhphurtute chungah action lak ngei ni se an ti a, bawhzui mek a ni," a ti.

MBOCWWB sum dan loa hman leh NIAS-a zir tura intirhnaah dan loa thil tihnaa mawhphurtute chu hriat loh vanga thil dik lo ti an nih pawhin sorkarin an chungah a ṭul anga action lak tho a tum thu a sawi.

LEIT Secretary sawi danin, NIAS hi kum 2007-ah West Bengal sorkar hnuaiah society anga register a ni a, kum 2013 thleng Punjab University hnuaiah awmin, kum 2014 aṭangin Annamalai University, Tamil Nadu hnuaiah a awm. Annamalai University hi kum 1923-a din, private university a ni a, Tamil Nadu sorkar hnuaiah an lut tawh.

University Grants Commission (UGC) chuan Annamalai University chu state danga zirna (institution) an hnena an inziak lutte chu titawp turin a hriattir a; chu chu Anamalai University chuan Tamil Nadu High Court-ah khingin, court thubuai a awm mek. Chutih laiin, High Court chuan UGC thupek chu a 'stay' rih a; thutlukna azirin NIAS hian university zawm a neih mumal dawn loh bakah, NIAS chu West Bengal-in fake institution-a a puan lai a ni.

Zirlaite'n harsatna an tawh hnua NIAS zir chiang tura ṭum hnih kal tawh LEIT Secretary chuan, "Zirlaite beiseina leh NIAS-te intiamna ang an pha lo. NIAS hi duhthusam chu a ni lo a, ka thlan tur chu ni se ka thlang lo ang. Kan thlan a ni lo a, an thlan chhan ka hre lo. A thlangtute'n thlan tlakah an ngai a, an thlang ni maiah ka ngai," a ti.

Inremna siam a nih anga zirlaite'n zirna hmanrua an dawng lo tih sawi awm a dik leh dik loh zawhna chhangin Benjamina chuan, "A dikna chen a awm. LEIT Secretary hna ka zawm hnuah pawh zirlaite harsatna ka hriat veleh an zirna hmanrua pe turin ka nawr a ni," a ti a; a nawr hnu hian NIAS hotute'n zirlaite chu zirna hmanrua an pe tih an hrilh thu a sawi.

Tun dinhmunah sorkarin a duh ber chu, NIAS-a zirlai la awmte'n zir zo se tih a nih thu sawiin Benjamina chuan, "Zirlaite'n an zir zawh ngei theihna atan hian theihtawp kan chhuah. Tunah hian zirlai tirh thlak 32 zingah third year exam thei tur pariat an la awm a, a bak panga pawh eng emaw tihfel chuan la exam thei an ni," a ti.

Zawhna chhangin LEIT Secretary chuan, "Zirlaite hian an zirlai an zo a nih chuan Annamalai University aṭangin degree an neih theih dawn avangin hna an hmuh theih ngei ka beisei," a ti a; NIAS-te chu an hnen aṭanga zir chhuak hna hmuhsak ngei an intiamna tihhlawhtling tura nawr a nih tur thu a sawi.

LEIT Secretary sawi danin, NIAS-in sum pek belh loin a tira inremna angin zirlai 32-te chu an zirlai zawhtir an inhuam a, mahse, zir duh an hmu tawh hrih lo.

Kum thum chhung atana zirna senso, a tìr lama pek tlak nghal chungchangah, "Instalment-a pek tur a ni a, first year, second year leh third year-ahte pek tur a ni. A petute'n a awlsam zawk an tih vanga pe tla nghal an ni mai thei," a ti.

MBOCWWB chungchang sawifiahin Benjamina chuan, "Kum 2009-ah din a ni a. Chairman chu LEIT Minister niin, Secretary chu LEIT Director a ni. Member 13 awmin, official-te bakah trade union leh Central YMA aiawhte an tel. Building leh construction hnathawkte aṭangin cess an la ṭhin," a ti a; cess chu construction work hnathawkte leh an fate hamṭhatna atana hman tur a nih thu a sawi.

LEIT Secretary chuan, MBOCWWB sum pawt pênga dan loa hman a nih chhan chu sum indaih lohna vang leh a dinna a la rei loh vanga thil hriat chian tawk loh vang ni theia a rin thu a sawi a, "Sum pawhpên rulh tumna lam ngaihtuah a la ni lo," a ti.

MYC Chairman-in inrawlhna an neih loh thu a sawi chungchanga zawhna chhangin Benjamina chuan, "MYC Chairman hian direct-a inrawlna an neih loh thu a sawiah ka ngai a, a dik lohna a awm lo," a ti.

Benjamina sawi danin, MoU-ah MYC hming a lang ve a, mahse MYC sum hman a ni lo a, thutlukna siamnaah pawh MYC Chairman a tel lo. Thutlukna siamtu chu MBOCWWB a ni.

LEIT thusawi Ṭhenkhat :
w Thil ti dik lotute chu hrem an ni ang
w Zirlai la awmte'n zir zo ngei se kan duh
w MBOCWWB sum hi hnathawktute leh an fate tan a ni
w MBOCWWB sum pawhpen rulh tumna a awm lo
w NIAS hi duhthusam chu a ni lo
w Intiamna angin zirlaite'n hmanrua an dawng lo
w NIAS thlan an nih chhan ka hre lo
w Zirlaite'n an zir zawh chuan hna an hmuh ka ring
w MYC an inrawlh tih theihna chin a awm