Minister hlui Zosiama Pachuau a thi

Mizoram sorkara minister hlui Zosiama Pachuau (73), Aizawl Venglai chu nimin zing dar 7 vel khan New Life Hospital-ah lung lam ṭha lo vangin a thi a, nimin chawhnu khan vui a ni.

Zosiama Pachuau hi August 15, 1944-ah Tual­chengah a piang a, kum 1972-ah Gauhati University aṭanga MA zoin, kum 1975-ah Delhi University aṭangin B.Ed. a zo leh a ni. June 26, 1974-ah Lalhmingliani, Kolasib nen an innei a, fa paruk an nei.

Kum 1984-ah politics-ah a lut a, People’s Confe­rence (PC) party a zawm. Kum 1984-a inthlanpuiah PC party ticket-in Ngopa bialah thlan tlin a ni a, he bial aṭang vêk hian kum 1987 leh 1989-ah thlan tlin leh a ni.

Kum 1993 inthlan-puiah Kolasib bial aṭangin thlan tlin a ni leh a, Mizoram sorkarah term khat chhung Cabinet minister a ni.

Zosiama Pachuau hi Dec. 28-ah New Life Hos­pital-ah admit a ni. Janua­ry 14, 2017 zanah ICU-ah dah luh niin, nimin zing dar 7:15 khan a thi ta a ni.

MPC chuan thuchhuah siamin, an party-a hruaitu hlun Zosiama Pachuau a thi chu an ui thu leh an sûn thu an tarlang a; a nupui, a tu leh fate leh a chhungkhat lainate zawng zawng Pathianin thlamuanna se an duh thu an sawi.