MNF-in NIAS-a zirte sum sên Rûl turin sorkar an phût

MNF party chuan Mizoram Youth Commi­ssion (MYC) chu siamṭhat a ngai hlea an hriat thu an sawi a; Nalanda Institute of Advance Stu­dies (NIAS), Kolkata-a sor­karin Mizo zirlai a tirh­te chu an sum sen tawh sorkarin a rulh an phût.

MNF general secre­tary (Vigilance) L Thang­mawia chuan nimin khan Aizawl Press Club-ah thuthar thehdarhtute a kâwm. RTI Act hmanga an zawhna chhannaah, MYC-in a thawhpui agency-te'n training-te dinhmun kimchang an pek ṭhin loh vanga record an neih loh thu an tarlang tih sawiin, "January 8, 2016-a MYC chairman T Sangkunga’n Aizawl Press club-a chan­chinbumite a kawmnaah phaia an tirh mi 3,640 zinga 2,050-in training zo tawh leh mi 1,000 velin hna hmu tawh anga a sawi hi pawm a harsa," a ti a; nasa taka hna thawk anga thu an thehdarh chuan belhchian a dâwl lo niin a sawi.

Thangmawia chuan, MYC-in Mizo ṭhalai a tirh chhuahte zirna leh zirlaite dinhmun dik tak a rang thei ang bera enfiah nghal a ngai tih sawiin, "Phai lama MYC tirh ṭhenkhatte awm dan ṭhen­khat chu sawi zahthlak leh hnam mualphona ni pha hialte a ni. An zirna hmun hi a lem a ni em tih te, an zir zawhah eng nge an thawh tih leh an hlawh zat thlengin mipuite'n kan ngaihvenpui an ngai ta," a ti.

MNF chuan NIAS, Kolkata leh Mizoram sorkar thuthlung zawm loh vanga Mizo zirlaite sum sen zawng zawng chu Mizoram sorkarin a rulh vek an phût. L Thangmawia sawi danin, class ṭan hmain study material an pe vek tur a nih laiin, second year an zir ṭan hnuah pawh an la dawng lo. October 2015-ah internship ti turin an chhuak a, March 2016-a NIAS-a an lêt leh chuan hmeichhe hostel an lo titawp a, Mizoram House-ah an awm phah a ni.

Zirlaite tirh an nih hmaa NIAS, Kolkata dinhmun an zir chian hmasak loh chhan sorkar an zawt a, "Sorkar pawm loh (fake institution)-a tirh an nih chhan chhui chian vat a ngai," an ti. NIAS ni lo, zirna in dangte pawh an mumal lo hlawm hle niin an sawi.

NIAS-a kum thum zir ngai BHM zir tur zirlai 32 tana senso nuai 128.20 chu hmanhmawh taka pek tlak chhan te, zirlaite'n complaint an thehluhte thuneitute'n an ngaihsak loh chhan te, March 30, 2016-a NIAS enfiahtuin inremna (agreement) thar an siampui chhante an zawt bawk.

L Thangmawia chuan, MYC chairman T Sang­kunga'n NIAS-a Mizo zirlaite tirh chungchangah MYC-in mawh a phur loa a sawi ṭhin chu a puitling zia lo an tih thu sawiin, "Mizo ṭhalaite hmakhua ngaiin MYC hi enfiah a, siamṭhat hna thawk vat turin sorkar kan phût a. Thil fel lo tam takah hian mawhphurna laa báng ngam turin MYC Chairman hi thuràwn kan pe a ni," a ti.

Zawhna chhangin L Thangmawia chuan, MYC Chairman chu a bàn theih nan hma an la chhun­zawm zel dawn tih a sawi a; an hmalak dan tur erawh chu an la ngaih­tuah tur thu a sawi a ni.

NIAS-a zir tur thlang­tu leh sum tumtu Mizo­ram Building and Other Construction Workers Welfare Board (MBOCWWB) leh nodal department LEIT lam thiam lohna leh demna thu sawi loa MYC lam hlir an beih chhan zawhna chu L Thangmawia hian a chhang mumal lo a; tuna an hmalaknaah MYC chu an subject a nih avangin MYC an thlûr bing niin a sawi.