KHAWTHLIR

R Day-ah tel vek tur
GAD chuan thuchhuah siamin, naktuka Republic Day hmannaah sorkar officer zawng zawngte tel turin a hriattir. Republic Day hi district, sub-division leh state headquarters-ah hlawhtling taka hman a nih theihna atan DC tinte chu an huam chhungah thupek puangzar tura hriattir an ni.

SSA ShaGUN
India ram puma SSA hnathawh leh hmalakna chi hrang hrang tarlanna tur, SSA ShaGUN portal chu January 18, 2017 khan India Habitat Centre, New Delhi-ah Human Resource Development minister Prakash Javadekar-a'n a hawng. Portal hi a duh apiangin ssashagun.nic.in-ah en theih a ni a; home page-a thlalak pasarih tarlan zinga pahnih chu Mizoram thlalak a ni.

CM-in pe
Mizoram sorkar chuan thuchhuah siamin, kumin Kuthnathawktute Ni-a kut hnathawktute an chawisan vang leh mi dangte ṭanpuina kawnga an thawh hlâwk vangin chief minister Lal Thanhawla'n Aizawl Thunders hnenah Rs. 1,00,000 a pek thu a tarlang.

Zirlaite hrilhfiah
Central YMA leh 39 Assam Rifles ṭangkawp chuan, Thawhṭanni khan Republic Higher Secondary School-ah Armed Forces Flag Day pualin Children’s Outreach Programme an buatsaih a; zirlaite chu sipai pawimawhna leh sipaia a luh theih dante an hrilhfiah.

Lirthei dah khap
Traffic SP chuan thupek chhuahin, naktukah Republic Day lawm a nih dawn avangin, venhimna atan zing dar 7 aṭanga chawhma dar 11 inkarah Brig. Vankunga Point (Dak Inpui), Treasury Square aṭanga Assam Rifles Hospital pêng (F Kapsanga Building, Dawrpui ep) inkar leh, Zodin Point aṭanga Temple inkar kawngpui sirah sorkar official leh mi sàwm bikte lirthei ni lo lirthei dang dah khap a nih thu a puang.