Bru-te'n Union Home Minister lehkha an thawn Chhungkaw tinte sorkar hna pek an phût

Bru Displaced Welfare Organisation (BDWO) tih invuah pawl chuan, nimin khan Union Home minister Rajnath Singh hnenah lehkha thehlut­in, Tripura-a Bru-te Mizorama lak let tumnaah inrawlh tur leh Bru lâk lette chhawmdawlna pek tura ruahman chu ngaihtuah ṭha turin an ngen. An thil phût zingah Bru chhungkaw tina mi pakhat tal sorkar hna thawhtir a tel.

Naisingpara, Tripura-a hmunpui nei BDWO-in Union Home Minister hnena lehkha an ziahah chuan, Mizoram Bru-te Mizorama lak letna tura Mizoram sorkar hmalak dan chu awmze nei tawk loa an ngaih thu an ziak a, "Kan din khawchhuahna leh hmasawnna tura hmalakna a awm lo a, sorkar laipui aṭanga sum hmuhna atan chauh hmalak a ni," an ti.

BDWO chuan, Mizorama Bru lak let tawhte dinhmun chu a chhe hle nia sawiin, zirna, hrilselna lam, inkalpawhna kawng, kawlphetha leh tui chung­changah Mizoram sorkarin hma a la ṭha lo niin an ziak a; "Thlai chinna turin ram inchi khat pawh an la pe lo a, vocational skill development training an ti lo a, hna an ngaihtuahsak lo," tiin, Mizorama Bru-te din khawchhuahna tur ngaihtuahsak turin an ngen a ni.

Sorkarin Mizoram Bru-te Tripura relief camp aṭanga Mizorama hruai kîr a tum chu tun dinhmunah an pawm theih loh thu tarlangin, BDWO chuan an thil phûtte an tarlang.

BDWO thil phut Ṭhenkhatte
* Eizawnna atan chhungkaw tin hnenah ram hectare 5 tal pek vek.
* Mizoram an chhuahsan hmaa Dampa Sanctuary chhunga an ramte enkawl theih.
* Chhungkaw tin aṭangin mi pakhat tal an thiamna ang zelin sorkar hna pek.
* Jammu & Kashmir Pundit-te pek ang ṭanpuina sum pek.
* Mizoram chhungah an duhna hmuna awm theih.
* Bru ṭhalaite tan skill development training siamsak.
* Mizorama hruai kîr an nih hmain an in tur an duhna hmuna sak lâwk.
* Khaw khatah chhungkua 500 aia tlem lo awmtir a, tui, sikul, kawlphetha, hriselna lam, anganwadi, kawng ṭha leh thil dangte siamsak.
* Chhungkaw tin hnena Pradhan Mantri Gramin Yojana (PMGY) pek.
* Ministry of Tribal Affiars hnuaiah Primitive Tribal Group dinhmun pek.
* Tripura sorkarin a tih anga Mizoram sorkarin Special Police Officers Bru ṭhalaite a lak ve.
* Central, Mizoram leh Tripura sorkarte leh Mizoram Bru Displaced People Forum-te inkarah inremna thuthlung ziah.