Chak zawka hna thawk turin Kalphung thlak a ṭul - Lalsawta

Planning minister Lal­sawta chuan nimin khan Economics and Statistics Directorate tlawhin, thawktute nen an inkâwm a; chak leh hlâwk zawka hna thawk turin kalphung thlak a ṭul ṭhin thu a sawi.

Inkawmhona hi Economics & Statistics director Lalchhuanawma Hrahsel-in a kaihruai a; Lalsawta chuan, "Chak leh hlâwk zawka hna thawk tur chuan kalphung thlak danglam a ṭul ṭhin a, thil ṭha zawk turah chuan rilru inhawng taka tih dan tharte dawnsawn thiam a pawimawh," a ti a; department kalphungah emaw, ram inrêlbàwlnaah emaw inthlak danglam a ṭul fo thu a sawi.

Lalsawta chuan, Economics & Statistics department chuan hna pawimawh tak an thawk tih sawiin, "He department hi sorkar laipui nen nghet taka in­thlun zawm a ni. State dang­te nena khaikhin pawhin Mizorama Economics & Statistics department hi hna thawk ṭha pawl a ni a, a fakawm hle," a ti.

Minister Lalsawta hi Planning secretary Dr C Vanlalramsanga'n a ṭawiawm a; inkawmhonaah hian department-a thawktute'n harsatna an neihte leh an hmalaknate an tarlang.