Inkhàrkhip chhungin sumdawnna lirthei Chi hrang 4-te'n Rs.21,13,59,500 an hloh

Covid-19 hripui léng vanga Mizorama inkhàrkhip chhungin Mizorama lirtheia sumdawngte sum hloh tawh zat chu Rs. 21,13,59,500 vela chhût a ni. Sumdawnna lirthei, a bikin mihring phur chite an tlân chhuah theih loh avangin driver leh conductor-te zingah harsatna tâwk puih ngai an awm zauh zauh.

Nunphung pangngaia awm laia sumdawnna lirthei chi hrang hrangte'n sum an lak luh zat anga chhûtin, inkhàrkhip vanga an tlàn theih loh chhunga sum an hloh zat chhût chhuah chu - city bus-te'n Rs. 1,34,00,000, taxi-te'n Rs. 18,00,00,000, inter-state maxicab-te'n Rs. 36,00,000 leh Pikup-te'n Rs. 1,43,59,500 a ni. Heta tarlan bakah hian sumdawnna lirthei dang eng emaw zat a la awm bawk.

Aizawl City Bus Owners Association (ACBOA) secretary PB Lalawmpuia'n Vanglaini a hrilh danin, nunphung pang­ngaia Ngaizel leh Zemabawk inkara city bus an tlan sevice ṭhin lai chuan ni tin bus 150 an tlân ṭhin a, bus pakhat chu ni khatah ṭum thum a kual hman ṭhin.

City bus pakhatin thla khatah Rs. 30,000 vel a la lut anga chawhrual a ni a, bus 150-in thla khata an lâk luh chu Rs. 45,00,000 vel a ni. Inkharkhip vangin March 19, 2020 aṭangin an tlân thei lo ṭan a, March thla bik hi a chanvea chhûtin cheng nuai 22 vel hloh ang an ni a; thla kal lai June-ah ni 20 thlengin thla chanve bawka chhûtin nuai 22 vel an hloh anga chhût a ni.

April leh May thla pumpuiah nuai 90 (nuai 45 + 45) an hloha chhût a ni bawk a; tichuan, inkhàrkhip tawh chhunga city bus-te'n an hloh  zat chu a tlem berah Rs. 1,34,00,000 (nuai 90+22+22) anga chhût a ni.

PB Lalawmpuia chuan, ACBOA member chu mi 262 an ni tih sawiin, an member zingah bus hlui tlân tawh lo, sorkara chhiah pe reng leh ACBOA-a fee la pe reng an awm thu leh Mizoram University leh zirna-in danga tlan city bus 30 vel a awm thu a sawi a; Sihphirah bus pariat, Sawkawrtuichhun leh Temple inkarah bus 18 an tlân thu a sawi bawk.

City bus-te chuan ni khatah diesel man tel loin Rs. 1,500 vel zel an la lutah ngaih a nih thu sawiin PB Lalawmpuia chuan, lockdown vangin driver leh conductor eng emaw zat hnenah ei tur an sem tawh thu a sawi a, "Driver leh conductor welfare-ah Rs. 20,000 kan pe a, a ṭul angin an member harsate an lo ṭanpui ṭhin," a ti.

City bus tan tlân hlâwk hun bik a awm avangin office aṭangin bus-te chu ni tin an tlân dan an thlâk kual ṭhin a; bus-te chu group paruk - A, B, C, D, E leh F-ah ṭhen niin, chawlhkar khatah group pakhat zel an ding (tlân lo) ṭhin a ni.

Mizoram Taxi Association (MTA) secretary Lalzawmliana chuan, inkhàrkhip chu taxi khalhtute'n an tuar nasa hle niin a sawi a, "Mizoram pumah sorkara inziak lut taxi 3,600 vel a awm a, MTA member bik chu 2,500 vel kan ni," a ti a; MTA member ni lote chu tlân kual tawp chite an ni hlawm tih a sawi.

MTA Secretary sawi danin, nunphung pangngaiah chuan taxi-te chu thla khatah ni 16 zel an tlân thei a, ni khatah Rs. 1,500 zel la lut anga chawh rual a ni. Taxi pakhatin thla khatah Rs. 24,000 (1,500X16) an la lut thei a, MTA member bik (mi 2,500)-ah thla khat chhungin Rs. 6,00,00,000 an la lut thei ang a ni.

April leh May thla pumpui leh March leh June thla chanve ve ve (a pahnihin thla khat) chhunga an hloh zat chu Rs. 18,00,00,000 (6,00,00,000 X 3) a tling.

MTA hi tun hmaa taxi pawl pahnih - owners association leh drivers associa­tion-te inzawm khawma a din a ni a, sorkarin hlawm pathum - A, B leh C-ah ṭhenin, ni khatah group pahnih zel hi an tlân a, group pakhat an chàwl ṭhin. Lockdown 4 laiin sorkarin mi phurh theih zat bithliahin, registration number odd-even angin a tlân chhàwktir a, rei vak lo an tlân chhunga sum lak luh chu a tam tham lo tih an sawi.

MTA hruaitute chuan, taxi neitute zingah loan laa taxi hmanga eizawnna bul ṭan eng emaw zat an awm tih sawiin, hun rei tak an tlân theih loh tawh avangin mangang tak tak an awm ṭeuh tawh thu an sawi a; MTA hian an member chhungkaw 741 an ṭanpui tawh a, local task force hrang hrangah puihna an pek bakah, CM Relief Fund-ah sum an thawh tawh tih an sawi bawk.

Inter-state Maxicab Service Association (IMSA) hruaitu Joseph L Vanchhawng chuan, an pawl member-te chu Meghalaya leh Assam-a tlân ṭhinte an ni tih sawiin, kuminah service mek maxicab 40 a awm tih a sawi. 

Joseph L Vanchhawng sawi danin, maxicab service pakhatin thla khatah Rs. 40,000 vel zel an la lut a, inkhàrkhip chhungin maxicab 40-in thla khatah Rs. 12,00,000 vel an hloh tihna a ni. Thla thum chhung, March 20 - June 20 inkara an sum hloh zawng zawng chu Rs. 36,00,000 tihna a ni.

Pikup Owners & Driver Association (PODA) assistant secretary Ramthuliana chuan, an pawlah member 160 an awm a, Aizawla mi deuh vek an nih rualin, thing­tlang lama mite pawh an awm ve nual a, Bawngkawn South Stand leh Lunglei Road Stand-a dingte an ni hlawm. Hetih lai hian, Aizawlah hmun danga ding ṭhin Pik-up pawl dang pawh an awm nia thu dawn a ni.

PODA member bikah, Pikup-te chu inkharkhip chhungin thla khat leh a chanve vel an tlân lo a, thla khat leh a chanve dang chu an tlân zauh zauh thung. Nunphung pangngaiah Pickup pakhatin thla khatah Rs. 30,000 an la luta chhût a ni a, pickup 160-in thla khata an lak luh chu Rs. 48,00,000 ((160X30,000) a ni. An tlân theih loh chhung zawng zawnga an sum hloh zat anga an chhût chu Rs. 1,43,59,500 a tling.

Ramthuliana chuan, inkharkhip vangin an member zinga chhungkaw pahnih chu pawisa leh buhfaiin an ṭanpui tawh tih a sawi.