Lengpui Airport cheinaa dan bawhchhiaa CM puhna Lokayukta-in a bawhzui Document mamawhte PWD an dil

Mizoram First Movement (MFM)-in Lengpui Airport tihchangtlunnaah dan bawhchhiatna awm ngeia an ngaih avanga chief minister Zoramthanga chhui chiang tura an ngenna chu Lokayukta-in a bawhzui zel a, Airport siam hna viltu PWD-ah document an mamawhte an dil.

Vanglaini thu dawn danin, Lokayukta hian MFM-in CM an puhna chungchangah PWD hnenah document hrang hrang an dil a, hriat fiah duh an neihte an zawt nghal. An thil dilte chu PWD-in an la pe lo a, an pek hunah zir chiangin, zawh belh duh emaw, document mamawh belh emaw a awm a nih chuan an bawhzui leh ang.

Lokayukta chuan, PWD aṭanga an hriat duhte an hriat hnu leh an mamawh ang document an neih hnuah CM puhna kalpui zel dan turah thutlukna a siam dawn a; chhui zui tlak loa a ngai a nih chuan thubuai a titawp ang a, chhui zui zel tlâka a ngai a nih chuan investigating wing a neih loh avangin ACB emaw, CBI emaw a chhuitir dawn a ni.

MFM hian Lengpui Airport tihchangtlun hna (contract) inpek chungchangah dan bawh­chhiatna awm ngei niin an ngai a, a mawhphurtu bera an puh Chief Minister chu finance leh audit lama mi thiamte chhui chiantir ngei turin an ngen. Chief Minister chhui chiang tura ngenna hi April 11, 2022 khan an thehlut a ni.

MFM chuan, PWD changtu CM Zoramthanga chu a thu­neih­na hmang khawlo leh chhungkhat laina duhsak uchuakah puhin, "India danpui Article 14 a bawh­chhiat avang te, General Financial Rules (GFR) 2017-a rule 162-na leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei tura ngenna Lokayukta-ah kan thlen a ni," an ti.