National Panchayat Award dawn lâwm

Local Administration department (LAD) chuan nimin khan Aijal Club-ah National Panchayat Awards 2022 lawmna an buatsaih a, LAD minister K Lalrinliana'n a hmanpui. Award hi khaw pali - Léng, Maubuang, Thingsul Tlangnuam leh Sawleng village council-te'n an dawng a ni.

K Lalrinliana chuan, thingtlang khaw tinte'n kawng hrang hrangah chak lehzuala hma an sâwn theihna turin tual­chhung inrêlbàwlna leh hmasawnna ngêlnghet siam a pawimawh thu a sawi a, "VC-te fuihna atan National Panchayat Awards hi sorkar laipuiin a buatsaih a, award dawng pha khawpa thawk ṭha VC-te ka lawmpui tak zet," a ti.

Sorkar laipui aṭanga hmasawnna hna thawhna tur sum lo kalte chu VC tinah sem ṭhin a nia sawiin Minister chuan, "A hman dan tur a huhoa rél turin VC ṭhenkhat chuan vantlang inkhawm (gram sabha) an kalpui ṭha lo ṭhin a, a pawi hle. Khaw mipui lungawina zâna hmasawnna hna thawhna tur sum hman dan tur gram sabha hmangin sawihoa kalpui a nih chuan inlungrualna a thlen a, insawiselna pawh a tlem," a ti a; vantlang rorel inkhawm chu neih ngei tura phût a nih thu a sawi.

Ministry of Panchayati Raj chuan India rama panchayat/ village council-te tan kum tin hlawm paliah National Panchayat Award a sem ṭhin a; kum 2022 hian Mizoram aṭangin Léng, Maubuang, Thingsul Tlangnuam leh Sawleng V/C-te'n an dawng a ni.

Léng (civic services theme) leh Maubuang (sanitation theme) VC-te hian Deen Dayal Upadhyay Panchayat Sashakitakaran Puraskar Award an dawng a; Léng VC hian Nanaji Des­hmukh Rashtriya Gaurav Gram Sabha Puraskar award an dawng tel.

Thingsul Tlangnuam VC-in Gram Panchayat Development Plan Award leh Sawleng VC-in Child-friendly Gram Panchayat Award an dawng a; Ngopa RD Block chu Best Performing Block for Peo­ple’s Plan Campaign 2021-ah thlan a ni bawk.