Sarâng thlâkna tur ngaihtuah mek a ni

Hman khat daih sarâng (single use plastic) khap a nih avanga sarâng thlâkna tur siam chhuak turin Mizoram sorkarin entrepreneur leh self help group-te ṭanpui dan tur a ngaihtuah mek. Sorkar chuan entreprenuer leh SHG-te chu Mizoram mamawh khawp siam thei tura ṭan la turin a duh.

Mizoram Pollution Control Board (MPCB) member secretary C Lalduhawma chuan Vanglaini palai zawhna chhangin, hman khat daih sarângte chu hmun hrang hrangah hmuh tur a la tam thu a sawi a, "Sorkar laipuiin hman a khap tawh a, micron 120-a chhah chin bak hman a phal tawh dawn lo," a ti.

C Lalduhawma chuan, "Hman khat daih sarâng thlâkna siam kawngah mau leh kuhva káwr hmanga paper bag, thlêng, fian leh a dangte siam thei entreprenuer leh SHG an la awm mang lo," a ti a; tuna awm chhunte pawhin Mizoram mamawh khawp an la siam theih loh thu leh ṭan la thar tura an duh thu a sawi.

Entreprenuer-te cho chhuah nan sorkarin sarâng thlâkna tur siam thei turte puih a tum thu sawiin C Lalduhawma chuan, "An tan sum lak luhna ṭha tak a nih dawn bakah, hman khat daih sarâng thlakna tur a ni dawn a, sorkarin hma an lakna turin loan laknaah puih theih dan tur kawng a zawng dawn a ni," a ti a; Mizoramah mau tam tak a awm avangin hman ṭangkai theih an beisei thu a sawi bawk.