Kuminah Lunglei district-ah Sikserh vei mi 456 hmu tawh

Lunglei District Task Force on Elimination of Malaria chu an chairman Kulothungan A, bawrhsap hoin May 10, Thawhlehni khan DC conference hall-ah an ṭhukhawm. Kum 2021 chhungin Lunglei district-ah sikserh vei mi 1,855 hmuh a ni a, sikserh vangin mi pahnih an thi a; kumin 2022-ah sikserh vei mi 456 hmuh a ni tawh tih tarlan a ni.

Lunglei district malaria officer Dr Lalrinthangi tarlan danin, kum 2021 chhung khan Lunglei district-ah sikserh vei mi 1,855 hmuh chhuah zinga 1,629 chu malaria Pf a ni a, mi 226 chu malaria Pv a ni thung a; malaria Rf vei mi pahnih an thi.

March 2022 khan sikserh endik rûnpui (MSAT) neih niin, mi 54,597 endik zingah sikserh vei mi 456 hmuh chhuah a ni a, sikserh vanga thi an la awm lo. Kumina sikserh vei hmuh tawh zinga a zatve vel chu natna lang chhuak lo an ni.

Bawrhsap Kulothungan A chuan, Lunglei district chu Mizorama sikserh vei tam lamah pahnihna a nih thu sawiin, "Malaria do kawngah tih tur tam tak kan nei a, line department-te'n ṭangrualin nangmahni zâwn ṭheuha mawhphurhnate ṭha takin hlen ang che u," a ti.

Ṭhutkhawmah hian Health, PWD, PHE, IPR, LAD leh Fisheries department aiawhte an tel a ni.