National Technology Day hman a ni

Nimin kha National Technology Day vawi 24-na a ni a, Directorate of Science & Technology chuan New Capital Complex-a Innovation Facility Centre-ah an lawm a, Human Resource Development Board vice chairman L Thangmawia, MLA-in a hmanpui.

L Thangmawia chuan, Zopa technology hmanga árhmul pawhna, changél channa, kuhva rah thelna, vaimim nuaina, buh denna, nimbu tui sàwrna, agarbati stick siamna leh thil dangte siam a ni chu lawmawm a tih thu a sawi a, "Mizoram mil Zopa technology tihchangtlun zel nan Innovation Facility Centre (IFC) hawn a ni a, centre kaltlang hian Zoram mamawh technology thar piang chhuak tur tam tak a la awm zel dawn," a ti.

Khuallian hian State Meteorological Centre-in mobile phone aṭanga Aizawl khawchin an en theihna tur 'Aizawl Automatic Weather Station' a hawng a; khualzahawm Lalmalsawma Pachuau, Planning (Science & Technology) secretary-in IFC-in thianghlim leh hrisel zawka sa rêpna tur an siam ‘Rêpmawi’ a tlangzarh bakah, inkhawm kaihruaitu chief scientific officer H Lalsawmliana’n 'Zoram mil technology' volume-I a tlangzarh bawk.

National Technology Day lawmnaah hian Science & Technology hnuaia MISTIC, MIRSAC leh Science Centre Governing Body leh Executive Body member te, science leh technology lama thawktu pawl - Mizoram Science Society, Science Teachers’ Association Mizoram, Mizo Academy of Sciences, Mizoram Mathematics Society leh Geological Society of Mizoram-a hruaitute an tel.

India chuan kum 1998 khan nuclear bomb siam thei ram a nihna lantir nan Rajasthan-a Pokran thlalêrah hlawhtling takin nuclear bomb a enchhin a, Trisul missile leh Hansa-3 thlawhtheihna hlawtling takin a enchhin bawk. Nuclear bomb enchhin ni chu National Technology Day-ah puan a ni a, kum 1999 aṭangin hman a ni.

National Technology Day hi ram hmasawnna atana technology pawimawhna inzirtirna hun atan hman a ni ṭhin.