Minister-in hna thawhna turte a tlawh

Minister of state Robert Romawia Royte chuan nimin khan Aizawl South-I biala Central Assistance to States for Capital Expenditure sum hmanga veng pasariha hna thawhna hmun turte a tlawh a; bialtu councillor David Zohmangaiha, PWD executive engineer R Lalbiaksangi leh mi pawimawh dangte'n an ṭawiawm.

Miniser hian Bethlehem Veng Sihluia luikawr chunga kawngpui siam tur te, Bethlehem Vengthlang mawng lama inkalpawhna kawng laihna tur te, College Venga inkalpawhna kawng te, Republic Vengthlanga link drain siamna tur te, Republic Venga kawng siam tur te, Venghluia kawngpui péngṭhuam siamṭhat turte leh Upper Republic-a hall sakna tur hmunte a en a ni.

Robert Romawia chuan, hna thawktu turte'n ṭha taka hna an thawh sorkarin a phût tih sawiin, "CM Pu Zoramthanga zarah Aizawl South-I ah Mizoram hmun hrang hrang angin hmasawnna a thleng ṭan mek. Covid-19 avangin hun rei tak harsatna tâwk mah ila, Pathian zarah boruak ṭha a thleng mek a, beiseina thar nen hma lam i thlir ang u," a ti.