CYMA OB ni tawhte an inhmukhawm

Kum 1935-a YMA din a nih aṭanga tun thlenga Central YMA office bearer lo ni tawhte leh ni mekte chu May 10, Thawhlehni chawhnu khan CYMA Committee Room-ah an inhmukhawm a, CYMA president R Lalngheta'n kaihruaiin, an inkawmho bakah zanriah an kîlho.

Tuna office bearer ni mekte nen CYMA-ah office bearer mi 107 an awm tawh a, tuna ni mek mi parukte nen mi 36 an la dam a, mi 71 an thi tawh. Ṭhenkhat chu upa tak tak leh taksa lama harsatna nei tawhte an nih avangin Thawhlehnia inkawmhonaah hian mi 18 an tel.

Tel zinga upa ber chu R Hautluanga (89), Upper Republic a ni a, ani hi kum 1969-1971 chhung general secretary a ni. Kum 83 mi Rev. Lalrinmawia, Khatla a tel bawk a, kum 1969-1971 chhung vice president a ni.

CYMA office bearer ni thei naupang ber Lalbiakmawia Ngente pawh telin, ani hi OB a nih tirhin kum 27 a ni a, kum 1991-1999 chhung OB a ni.