MADC-ah opposition ni ngam turin Kan inpeih ṭhap - MNF Adviser

MNF adviser Dr K Beichhua, Mizoram sorkara minister of state ni bawk chuan nimin khan Siahaa an party pisaah thuthar thehdarhtute a kâwm a; Mara Autonomous District Council (MADC)-ah a ṭul chuan eptu (opposition) ni turin an inpeih ṭhap thu a sawi.

Dr K Beichhua chuan, MADC-ah sorkar tura an inbeisei laiin, party mal sorkarna siam thei an awm lo tih a sawi a, "Ṭangrual sorkar piantir ngaia a awm hi Pathian remruat ngei a nih ka ring. Sorkarna siam turin theihtawp kan chhuah ṭheuh a, vawiin thlengin sorkarna siam thei han sawi mai tur kan awm lo. Mara ram mipui chî-âi taka kan dah hi MNF party chuan pawi kan ti hle a ni," a ti.

MNF party-in sorkarna siam tumin an remhriatna hrang hrangin hma an la tih sawiin Beichhua chuan, "Vawiin thlenga sorkarna siam thei tur thutlukna a la awm loh avangin MNF Legislature Party chuan MADC siamṭhat a duh avang leh Mara ram mipui hmangaihna avangin inhuamna sang tak kan nei," a ti a; a ṭul chuan eptu ni turin lungrual taka an inpeih thu a sawi a ni.

Dr K Beichhua chuan, sorkar siam tura an hmalakna an la khâr loh thu sawiin, "Sorkarna min siampui thei tan chuan inbiakremna nen kawng zau tak kan hawng reng a ni," a ti.

MNF Adviser chuan, inthlanah MNF-in vote 14,062 an hmuh laiin BJP-in 11,708 an hmuh thu sawiin, "Kan vote hmuh aṭang hian Mara ram mipuiin MNF sorkarah rinna an nghahzia leh an rin tâwkna a lang chiang hle," a ti a, Mara ram mipui hnenah an lawmthu a sawi.