DIET bul kawng siam danah lâwm

MNF ṭhalaite chuan thuchhuah siamin, UDPA leh PWD-te'n Ramhlun North-Chaltlang Road, DIET bul kawng an siamnaa hna thawh dan leh hma an lak tawh chin chu lawmawm an tih thu an tarlang.

Ramhlun North-Chaltlang kawng hi nimin khan MNF ṭhalai hruaitute'n an vice president Lalzahawma Khiangte hoin an tlawh a; Lalzahawma Khiangte chuan, Mizorama hmasawnna ruhrel lian ber berte chu MNF sorkar kutchhuak a nia sawiin, Aizawl phei chu MNF ministry thuam mawi a nih ber thu a sawi.

MNYF Vice President chuan, Ramhlun North-Chaltlang kawng chho ing-euh tak ṭhin nuam taka siam a ni ta chu lawmawm an tih thu sawiin, "Mipuite'n sorkar ṭha kan neih avanga hetiang hmasawnna lo awm a ni tih an hriat kan duh a, kan tlawh a ni," a ti a; state-a hmasawnna awm turin hna thawhna tur sum a ngai a, Mizoram chu state intodelh lo a nih avangin sorkar laipuia sum sawi chhuak thiam an pawimawh thu sawiin, "Chutiang ti tur chuan chief minister Pu Zoramthanga hian distinction a pass zak a ni," a ti.

Tun hnai kum thum chhungin Mizoram kawngpui a ṭha sâwt nia sawiin MNYF Vice President chuan, "Inkalpawhna ṭha ngai pawimawhtu MNF sorkar kan neih vang a ni," a ti a; Aizawl traffic tâwt avanga buaina pumpelh nan sorkarin ngaihtuahna a séng a, theihtawp a chhuah niin a sawi bawk.