Sarâng tihtàwp dan tur sawiho

Kolasib District Committee on Single Use Plastic chuan nimin khan DC conference hall-ah bawrhsap John LT Sanga hoin hman khat daih sarâng (plastic) zawrh leh hman tihtawpna tura hmalak dan tur an sawiho. May 17 & 21, 2022 khian district khaw chhunga bazar hmunah inzirtirna buatsaih an rél.

Sorkar laipui chuan June 5, 2022 hmain hman khat daih sarâng (single use plastic) zawrh leh hman tihtawp a nih theih nan ruahmanna a siam a; Kolasib-a sorkar hotute chuan, hmalakna hmasa atan sorkar pisa hmunte chu hman khat daih sarâng awm lohna (single use plactic free)-a puan a nih theih nan hmalak an rél a ni.

Khawtlang leh kohhran tin hnenah hman khat daih sarâng hmang lo tura ngenna tihchhuah te, harsatna a awm zui loh nan Kolasib district-a kuhva hnah leh hmanraw dang aṭanga thlêng, fian leh no siamna khawlte zir chian te, hman nawn theih bazar ip hman intihhmuh leh sarâng hmang lo tura inzirtirna bazar leh gram sabha-ahte buatsaih ni se, an ti a; rawtna te chu chak taka bawhzui a nih theih nan endiktu leh viltu tur ruat ni se, an ti.

Khaw chhung hmun lailía plastic collection centre neih belh dan tur te, Thingdawla Plastic Bailing Machine leh Solid Waste Management Centre-a awmte ṭangkai zawka hman dan tur leh, Committee member-ah khawtlang leh tlawmngai pawl hruaitute ruat telte an rêl bawk.