Assam police chhuahtir turin ZPM Ṭhalaiin Home Minister an phût

ZPM Ṭhalai chuan, Vairengte khaw ram Mautui zaua awm mek Assam police-te an chhuah thuai theih nan huaisen taka hma la turin Home minister Lalchamliana an phût.

ZPM ṭhalaite chuan thuchhuah siamin, Vairengte Mautui zaua huan neite chêt velna Assam police-in an khuahkhirh a, huan neitute feh tur Assam police-in identity card an siamsak tih sawiin, "Mizoram chhung ngeia Mizote kan huana kan feh tur Assam police-in an duh dan dana ro an lo rél a, ID card hial an lo siam hi lungchhiatthlâk kan ti a, Home Minister chak loh vangah kan ngai," an ti.

Kumin kum tìr aṭangin Mautui zaua Mizote huanah Assam police-te'n camp sa-in an duty ṭhin tih sawiin ZPM ṭhalaite chuan, "An kuhva kûngte pawh an tihchhiatsak a ni," an ti a; Vairengte Mautui zaua huan neite rilru a nat thu an sawi.

ZPM Ṭhalai chuan, "Mautui zaua huan lo ram neite Assam police-in an siam chawp ID card tel loa zalên taka an veivah theih nan leh Vairengte khaw chhung mite pawh Mautui zau hi Mizoram chhung ngei a nih anga zalen taka an ramkal theih nan te, Mautui zaua Assam police-te hi an chhuah thuai theih nan huaisen taka hma la turin Home Minister kan phût a ni," an ti.