Champhaiah pass dilna 187 pawm

Champhai Town Land Committee chu an chairman James Lalrinchhana, bawrhsap leh district collector ni bawk hoin nimin khan an ṭhukhawm a, Champhai khawpuia house pass, periodic patta leh land lease dilna 199 zinga 187 an pawm.

James Lalrinchhana chuan, khawpui ṭhang zel leh nakin hun thlenga khawpui hmakhua ngaihtuah chunga hmalak a ṭul thu sawiin, "Awmze nei taka Champhai khawpui chei mawi, thuam ṭhat leh hmasawnna kalpui kawngah hmathlir thui tak neih a ngai," a ti a; hun lo la kal zel tur thlir chungin dilna lutte ngun taka zir chian hmasak a ṭul thu a sawi.

Ṭhutkhawmah hian Champhai khawpuia veng 17 aṭanga dilna lut 199 - house pass dilna 197, periodic patta leh land lease dilna pakhat ve vete chu Land Revenue & Settlement department zirchianna leh record neihte behchhanin zir chian a ni a, dilna 187 pawm a ni. House pass dilna pakhat hnâwl a ni a, dilna dang 11 chu ennawn leh atan an dah thung.