PMKSY hnuaia hmalaknate sawiho

Rural Development minister Lalruatkima chuan nimin khan Pradhan Mantri Krishi Sinchayee Yojana (PMKSY) Version 2.0 chungchangah district tina RD officer leh thawktute video conference kaltlangin hmalakna leh hmachhawpte a sawipui.

Lalruatkima chuan, project ruahmanna atan sorkarin fund hmahruai ṭhenkhat a dawng tawh tih sawiin, "Thawktu lak leh training-te kalpui mek a ni. PMKSY 2.0 hnuaia hnathawhte hi central, state, district leh project level-ah kalphung mumal tak sorkar laipuiin a siam anga kalpui a, document felfai taka vawn bakah, computer software application MIS, GIS leh PFMS-te data mumal taka dah luh a ni," a ti.

Sawihonaa tarlan danin, PMKSY WDC 2.0 hian inkaihhruaina (common guideline) a nei a, chumi behchhan chuan hna thawh ṭhin a ni. Project-in a tum ber chu leilunga innghat hmasawnna a ni a, ram chhe tawh siamṭhat, ram ṭha lai vawn him, tuihna siam leh humhalh, leilung kal ral tur vente a tel.

Project-in a tuam chin khuaa mi chhumchhia leh hmeithai, eizawnna mumal nei lote mimal leh self help group anga eizawnna ruahmansakte a tel bawk.

PMKSY-WDC 2.0 hnuaiah hian project pakhat zelah ram hectare 2,000 - 2,500-a zauah hmalak a ni a, hectare khat chu Rs 28,000 zela chhût a ni. Project sum hi central-in 90% leh state-in 10% a tum a, Mizoramah RD block 18 leh khua 47 a tuam a ni.