KHAWTHLIR

Thisen pe
LR Security chuan nimin khan Synod Hospital Blood Bank-ah thisen pek huaihawtin, thisen unit 15 an pe a, petute mipa 13 leh hmeichhia pahnih an ni.

Covid-19 thlirho
Aizawl District Task Force on Covid-19 chuan nimin khan an chairman Dr Lalhriatzuali Ralte, district bawrhsap hoin Covid-19 dinhmun leh School Inspection Team hmalak dan tur an sawiho. Aizawl East leh Aizawl West chief medical officer-ten Covid-19 dinhmun leh vaccine pek tawh dan an tarlang a ni.

DDMA ruat thar
Mizoram sorkar chuan district tina District Disaster Management Authority member turte a ruat thar. DDMA chairperson chu district bawrhsap (ex-officio) a ni dawn a, co-chairperson chu DRDA project director emaw, autonomous district council-a chief executive member emaw an ni ang. Member turte pawh an nihna (designation) hmangin ruat a ni bawk.

CSC hmangin dil theih rih loh
Aizawl bawrhsap Dr Lalhriatzuali Ralte chuan tribal certificate pek chhuah dan siamṭhat a ngaih avangin nimin aṭang khan common service centre kaltlangin tribal certificate dil theih a nih loh thu a tarlang. Tribal certificate dil duh tan Aizawl DC pisaa Judicial Branch-ah dil theih zel a ni thung.

Aizawla thirsakawr khalh thinte ngen
Traffic SP Rodingliana Chawngthu chuan, Aizawl khawpui chhunga thirsakawr (cycle) khalh ṭhinte chu zing dar 9 leh tlai dar 5:30 inkarah Zemabawk aṭanga Kulikawn inkar leh, Temple Square aṭanga Vaivakawn inkarah tlân lo turin a ngen. Zan lama thirsakawr khalh ṭhinte chu a hma leh hnung lamah êng (light) emaw reflector emaw vuah turin a hriattir bawk.

PC-in lawmawm ti
PC party chuan thuchhuah siamin, Mizoram Legislative Assembly kum 50-na, golden jubilee a thleng ta chu lawmawm an tih thu an tarlang a, "A tìr aṭanga vawiin thlenga he rorelna in sang zahawm taka MLA lo nih tawhte PC party chuan zahna chibai kan bûk a, ram leh mipui tana an inpekna leh thawhrimnaah lawmthu kan sawi a ni," an ti.