Hripui vei hmuh thar an pung leh hret

May 10, Thawhlehni khan Mizoramah Covid-19 vei mi 33 hmuh chhuah a ni a, ni thum chhung a pung leh hret hret. Nimin khan hripui vei dam tawh mi 46 chhuahtir an ni a, Covid-19 vei zingah thi an awm lo.

Thawhlehnia Covid-19 vei hmuh tharte chu mipa 14 leh hmeichhia 18 an ni a, RAT hmanga hmuh vek niin, positivity rate chu 7.73% a ni. Swab sample endikna hmanraw danga endikte a negative vek.

IDSP record angin, Mizoramah Covid-19 vei 2,27,794 hmuh chhuah a ni tawh a, mipa 1,06,072 leh hmeichhia 1,21,722 an ni a, mipa aiin hmeichhia 15,651-in an tam zawk. Nimin tlai dar 5 thleng khan mi 2,26,943 (99.63%) chhuahtir an ni tawh a, mi 697 (0.31%) thi tawhin, enkawl mek mi 154 (0.06%) an awm.

Ni kaw chhung a záwnin Mizoramah Covid-19 vanga thi an awm tawh lo a, thi an awm hnuhnun ber chu May 2, 2022 kha a ni. Nimin tlai khan hripui vei enkawl lai mi 154 chiah an awm a, April 12, 2021 hnua active case an tlem lai ber a ni.

Mizorama district zawng zawngah hripui vei inenkawl lai mi 50 awm tlinna a awm rih lo a, enkawl lai tamna ber Saitual district-ah mi 46 an awm. Lawngtlai district-ah positive an awm rih lo a; Champhai, Hnahthial, Siaha, Kolasib leh Khawzawl district-ah positive enkawl mek mi 10 aia tlem ṭheuh an awm mek.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,794 chu mi 1,000 zelah hripui vei mi 207 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.