National Voters’ Day hman a ni

India ram hmun dang rualin nimin khan Mizoram hmun hrang hrangah, ‘7th National Voters’ Day’ hman a ni. Aizawlah chuan Vanapa Hall-ah hman a ni a, Governor Lt. Gen. Nirbhay Sharma-a'n a hmanpui.

Larsap chuan, India ramah pawh inthlan dan kalphung siamṭhat zel a ni tih sawiin, "Tunah chuan Digital India hmalakna hnuaiah khawvel ramte zinga inthlan dan awlsam leh felfai ber pawl kan ni hial tawh. Mizoram phei chu inthlannaa kalphung thar siam EVM leh VVPAT hman hmasak berna state a ni," a ti.

Mizoram chu inthlanna felfai leh muan­awm neih kawngah state dangin an tluk loh leh entawntlak a nih thu sawiin Governor chuan, "Mipui ṭan­rualna bakah kohhran leh NGO-te thawhhona rah a ni. Ram chhunga ṭhalai vote nei tharte'n he níah hian India ram ropui tak, mipui rorelnaah chanvo an nei thar tur hi a lawmawm hle," a ti a; mipuite chu ram rorelna ṭha zawk siam nana an vote hlutzia hre turin a chah.

Governor chuan, kawng tam takah Mizote chu hnam ngaihsanawm leh entawntlak an nih rualin, tunlai khawvel changkang zelah ṭawng thiam tam turin a fuih a, "Mizo hnam leh khawtlang inrêlbâwl dan ṭha thawkhat hle mah se, mipuite inhawn zau a, ram leh hnam dangte nena inpawh zual deuh deuh thei se ka duh," a ti.

Governor hian National Voters’ Day puala lemziaka inelnaa tiṭhate leh booth level officer (BLO) thawk ṭhate hnenah lawmman a sem nghal a ni.

BLO ṭha lawmman dawngtute chu - pakhatna Rodingliana Ralte, Mission Vengthlang; pahnihna Chalthanghlira, Buhbân leh pathumna Hualkunga, Zohmun te an ni.

Drawing competition-a lawmman dawngtute chu - pakhatna Melody Lalrinchhani, MICS a ni a, pahnihna leh pathumna chu Jonathan Lalchhandama, Central H/S leh B Lalnunsiama, Bethlehem H/S-te an ni.

Joint chief electoral officer FJ Liantluanga pawhin thu sawiin, "Election Commission of India-in hmun kilkhawr ber thlenga mipuite fan chhuak a, vote nei thei kumtlingte EPIC siamsak hi a ngai pawimawh em em a, hei hi Indian democracy tiropuitu leh tihlutu a ni," a ti.

FJ Liantluanga sawi danin, kumin Natio­nal Voters’ Day pual hian Mizoram district hrang hrangah Special Awareness Camp, Inter-Active School Engagement for Student (kum 15-17) leh college zirlaite tan essay writing competition-te buatsaih a ni.

MJA president Vanlalrema Vantawl pawhin thu sawiin, mipuiin hruaitu an thlan lalna ramah chuan vote thlak chu tihmâk­mawh a ni tih a sawi a, "Vote neitute hi democracy bulṭhut kan ni a, kan tel lo chuan ram a kal thei lo. National Vote's Day pawh hi mimal tinin duh thlan theihna kan neih lawmna ní tiin an sawi ṭhin a ni," a ti.

Inkhawmah hian Assembly speaker Hiphei, Home minister R Lalzirliana, Finance minister Lalsawta leh MLA PC Zoram Sangliana te pawh an tel a ni.