Chapchar Kût thupui atan 'Aia upa zah' thlan a ni

Chapchar Kut Orga­nising Committee chu nimin khan chief minister Lal Thanhawla hoin CMO conference hall-ah an ṭhukhawm a; kumina Chapchàr Kût thupui atan 'Aia upa zah' tih an thlang.

Chief Minister chuan, Chapchar Kut chu Mizo kûtpui a nih angin, kût hmanna tura mawhphurhna neite chu an tih tur ṭheuhah Mizo tlawmngaihna rilru pu chunga ṭhahnemngai taka thawk tura a duh thu a sawi a, "Mipui mimir huapzo thei ang bera kût hman a nih theih nan ngaihtuahna uluk taka sên a ṭha," a ti.

Meeting chuan, kum danga tih ngai loh, Chap­char Kûtah thupui neih tawh ṭhin ṭha an ti a; kumina thupui atan 'Aia upa zah' tih an thlang a ni

Kûtah hian Zo thuam inbel turin sorkar hnathawk, driver leh conductor-te ngen an ni dawn a, kawng dunga dawr leh in tina tàr tur puanzar (flag) siam tum a ni bawk.

Meeting-ah hian kût hman dan tur kimchang duangtu tur Art & Culture Director kaihhruaina hnuaiah Programme Sub-Committee din a ni a; Mizo hnam ziaráng pho lang tam thei tur záwngin hnam lâm, zai leh rimawi chi hrang hrangte a tam thei ang ber telh ṭha an ti tih a ni.

Ruahmanna siam dan chuan, Chapchar Kut hi Lammualah hman a ni dawn a, Kut Pa atan CM Lal Thanhawla a ni ang.