KHAWTHLIR
MJA member thar
MJA general headquarters hruaitute January 24, 2017-a ṭhukhawm chuan MJA member atan mi pali lak luh an rem ti. MJA member atana lak tharte chu - TC Lalmuankima, All India Radio, Aizawl; Rochungnunga, Vanglaini; T Lalhunmawia, Zawlbuk, Aizawl leh, C Lalmuanzova, Chhawrpial-te an ni.
Tlân phal lo
Traffic SP chuan thuchhuah siamin, Chanmari West kâwipui aṭanga Lalsangliana Filling Station, Edenthar Veng inkar chu PWD-te'n an siam dawn avangin zing dar 9 aṭanga tlai dar 4 thleng lirthei tlân phal a ni lo.
Heroin man
Champhaia Excise & Narcotics department enforcement-te chuan, January 24, 2017 tlai dar 4:30 khan Champhai Zotlangah heroin gram 102 (hawng 6) leh a neitua puh Hlunkhawkhai (40) s/o Thawngngam (L), Khampat, Myanmar leh Lalhruaithanga s/o Hranghleia, Lianhna, Myanmar nia inchhálte an man. Heroin neitute hi NDPS Act tlawhchhanin thubuai siamsak an ni.
Ruang chhar
Nimin zing dar 8 vel khan Green View Motel, Phunchawngah Lalhmangaihzovi (19) d/o Isaaka, Bungkawn chu thiin hmuh a ni. Thu dawn danin, Lalhmangaihzovi ruang bulah hriau leh chhìnsen bûr ruak hmuh a ni a, zan lama a riahpui Lalnunkima s/o Ali, Sairang chu a tlanbo avangin police-te'n an zawng nghal a ni.
Rinawmna thutiam
National Voters' Day pualin nimin khan Mizoram sorkar hnathawkte'n ram tana rinawmna thu an tiam. Secretariat-ah chuan chief secretary Lalmalsawma kaihhruaina hnuaiah thawktute'n thu an tiam a ni.
Thing ru man
Pachhunga University College (PUC) chuan, January 24, 2017 khan an college ram chhunga thing ru lai an man. PUC chuan, an college campus-a thingte chu an enkawl leh humhalh a ni tih tarlangin, venpui turin mi tin an ngen.