H Rohluna'n SSA leh Hindi zirtirtute Hlawh pe turin HRD Minister a ngen
School Education minister H Rohluna chuan, nimin khan New Delhi-ah Human Resources Development (HRD) minister Prakash Javadekar a hmu a; Hindi zirtirtute leh SSA hnuaia thawkte hlawh tur pe thuai turin a ngen.
Sorkar thuchhuah tarlan danin, School Education Minister hian SSA sum second instalment pe chhuak thuai tur te, centrally sponsored scheme (CSS) hnuaia Hindi teacher-te hlawh hun rei tak an lak tawh loh chu pe thuai tur leh, Hindi zirtirtute chu kum 10 dang thawh chhunzawmtir (extend) turin a ngen nawn leh a ni.
Prakash Javadekar chuan, SSA sum second instalment chu rang taka sanction order tihchhuah a nih tur thu H Rohluna chu a hrilh a; CSS hnuaia Hindi zirtirtute hlawh leh an service kum 10 dang pawhsei chungchang chu HRD ministry-in a ngaihtuah mek thu a sawi.
Union Minister a hmuh zawhah School Education Minister hian HRD secretary Anil Swarup chu a pisaah a hmu leh a; HRD Minister hnena an thil thlente a hlawhtlin ngei theihna atana theihtawp chhuahpui turin a ngen.
School Education Minister hi parliamentary secretary (School Education) Joseph Lalhimpuia, Delhi Mizoram House-a principal residence commissioner Arvind Ray, OSD Uma Kant leh School Education deputy director Lalchungnunga ten an ṭawiawm a ni.