MHIP-te Court tualah kalkhawm

August 10, 2013 zana Zohmangaihi (49) d/o Ramfangzauva thattua puh, a pasal Lalrem­ruata Ralte (39) s/o Lalchung­lura, Zarkawt chu nimin khan Aizawl District Court-a inlan tura tih a nih avangin MHIP general headquarters hruaitute leh Zarkawt Branch MHIP member-te Court tualah an kalkhawm.

MHIP gen.hqrs. president Lalthlamuani'n Vanglaini palai a hrilh danin, Lalremruata Ralte hian bail a dil a, bail a dilna chu nimin khan Court-in ngaihtuah a tum niin an hria a; Lalremruata chu bail-a chhuahtir an duh lohzia lantir nan Court tualah an kalkhawm a ni. Lalremruata bail dilna hi a ukil a kal loh avangin niminah Court-in a ngaihtuah lo nia thu dawn a ni.

Lalremruata Ralte hian a nupui Zohmangaihi hi August 10, 2013 zanah a thata hriat a ni a, a tuk August 11-ah Delhi lamah a zin san nghal. Lalremruata chu police-in thu an zawhfiah hnuah, a nupui chu a that a, Sihphir dáia bawhhlawh paihnaah a paih niin a sawi a; a paihna hmun aṭangin Zohmangaihi ruang chu August 19, 2013 chawhnuah lak chhuah a ni.