Supplier Sudhir Bajaj hrem turin ngen

Mizo Students’ Union (MSU) chuan, Horticulture department-a supplier Sudhir Bajaj chu hna a thawh ṭhat loh avangin supply leh contract hna pe tawh lo tura ngenna nimin khan Horticulture enkawltu Minister leh Parliamentary Secretary hnenah lehkha an thehlut tih an tarlang.

MSU thuchhuah chuan, Sudhir Bajaj hian Mizoram Horticulture department hnuaiah supply leh contract hna tam tak a hmu a, mahse, supply hna a hmuhte chu pe kim duh loin a thawk ṭha lo hle niin a tarlang a, "Sudhir Bajaj-a hna thawh danah MSU chu a lungawi lo hle a ni," a ti.

MSU hian Horticulture department enkawltu Minister leh Parliamentary Secretary-te chu Subhir Bajaj-a chunga action la tur leh a thurualpui ṭhin Mizote pawh hrem a, supply leh contract hna pe tawh lo turin an ngen a ni.

Hnam dangte'n Mizo­­rama tenawm taka sumdawnna an kalpui a, thawk ṭha leh duh si lote chu an ngaimawh thu sawiin MSU chuan, "Insiamrem ching supplier leh contractor-te an rawn thurualpui ṭhin hi MSU chuan a ngaimawh hle. Heng mite hi kan ram hmelma an nih avang­in MSU chuan a chhui chiang­in a hmachhawn ang a, a ṭul angin hma a la zel dawn a ni," an ti.

MSU chuan, Transport department-ah hnam dangte'n Mizo hming hawhin lirthei an register ṭhin an hriat thu sawiin, an chhui mek thu an sawi a; Transport department chu uluk zawka enfiah a, hnam dang lirtheite Mizo hminga register tawh lo turin an ngen a ni.