Mizoram Agro & Allied Products titawp turin MZP-in sorkar an ngen

Mizo Zirlai Pawl (MZP) chuan thuchhuah siamin, Mizoram sorkarin Mizoram Agro & Allied Products, Luangmual registration tun thlenga a la titawp (cancel) lo chu an hriatthiam loh thu an tarlang a, registration titawp nghal turin thuneitute an ngen.

MZP chuan, Mizoram Agro & Allied Products neitute chu zirlaite'n fee chi hrang hrang an chawi tawhte zirlaite hnenah January 31, 2017 ral hma ngeiin pe kîr vek turin an ngen a, "Kan ngenna hi tihhlawhtlin a nih loh chuan dan anga hrem a nih theih nan MZP chuan hma a la zel dawn a ni," an ti.

Mizoram Agro & Allied Products-in zirna an kalpui danah thil fel lo leh zirlaite'n an zir tur an zir loh tam tak a awm avangin MZP chuan October 4, 2016-ah Zonuam Police Outpost-ah FIR an thehlut a ni.

MZP tarlan danin, Mizoram Agro & Allied Products neitu chu Solomon Vala s/o Lalhmingthanga a ni. Zirlaite aṭangin course fee lak loh tur tih a nih laiin, thla tin course fee an la ṭhin a, zirna a mumal loh bakah, an course neih lohte pawh zirtirin, pawisa tam tak zirlaite an laksak ṭhin.

Solomon Vala s/o Lal­hming­thanga'n zirlai awm si loin zirlai ṭhahnem tak nei angin sorkarah hamṭhatna a dil ṭhin nia sawiin MZP chuan, "A institution-a zirlaite hi certificate lem leh marksheet lem a siamsak ṭhin bawk," an ti.

MZP sawi danin, Mizoram Agro & Allied Products hi Mizoram sorkara Labour, Employment & Industrial Training department hnuaia registration nei a ni a; a course zinga mi ni lo Dialysis leh Panchakarma te an zirtir a, chuvang chuan zirlaite aṭangin thla tin course fee Rs. 2,000/2,500 an la ṭhin.

Chutih laiin, LEIT department-a thawktute chuan course fee chawi a ngai lo niin an sawi a; test fee erawh chu tlem a zawng chawi a ngai thung. Kum 2012 aṭanga zir tawhte pawh tun thlengin certificate mumal pek tur a la nei lo bawk.