Oil palm chíngtute tan training buatsaih

Indian Council of Agricultural Research (ICAR) - Indian Institute of Oil Palm Research (IIOP) leh Mizoram sorkara Agriculture department chuan Kolasib, Aizawl, Serchhip leh Mamit district-a oil palm chíngtute tan nimin khan Kolasib-a Agriculture conference hall-ah training an buatsaih a, Kolasib DC H Lalengmawia'n a hmanpui.

H Lalengmawia chuan, Kolasib district chu Oil Palm District tia hriat khawpa oil palm thar tamna a nih thu sawiin, "District dangte'n kan hnathawh dan leh hmalak dante zir tlaka an ngaihtheih nan leh Mizoram páwn aṭang pawha kan tih dan zir tura mi kan hîp theih nan ṭan kan lak zel a ṭul," a ti.

Oil palm chíngtu kalkahwmte chu ICAR-IIOP principal scientist Dr P Naveen Kumar leh Dr MV Prasad ten thil pawimawh hrang hrang an zirtir a ni.

Dr MV Prasad chuan, Mizoramin oil palm tam zawk thar chhuak tura theihna a neih thu sawiin, "Tun dinhmunah Mizoram hi India rama oil palm chíng tam ber pahnihna a ni a, tun ang zela thar chhuah a san chhoh chuan international standard a thlen phak thuai a beiseiawm," a ti.

Oil palm hi kum 2001-ah Kolasib district-a Thingdawl leh Lunglei district-a Rotlang ramahte chìn chhin a ni a, a ṭha duh hle tih hriat a ni. Mizoram hi India hmarchhaka oil palm chíng hmasa ber a ni a, kum 2004-05 aṭang khan Integrated Scheme on Oilseeds, Pulses, Oil Palm & Maize (ISOPAM) hnuaiah hmalak ṭan a ni.

Kum 2004 khan The Mizoram Oil Palm (Regulation of Production and Processing) Act pass a ni a, chak taka hmalak a nih theih nan state level, district level leh village level-ah committee hrang hrang din a ni. Tun dinhmunah oil palm chìn theihna tura ngaih ram hectare 1,01,000 a awm a, hectare 25,027 (24.78%)-a zauah chìn mek niin, district pasarih tuam a ni tawh.

Oil palm thar chhuahte chu sorkarin inremna a siampui company pathum - Godrej Agrovet Ltd., Ruchi Soya Ind.Ltd. leh 3F Oil Palm Agrotech Pvt. Ltd ten an lei ṭhin a ni.