Republic Day vawi 68-na lawm a ni

Nimin khan India ram pumah Republic Day vawi 68-na lawm a ni a, Mizoramah pawh hmun hrang hrangah lawm a ni. Aizawlah chuan Lammualah hman a ni a, Governor Lt.Gen. Nirbhay Sharma-a'n hnam puanzar pawt pharhin, parade contingent-te'n hnam puanzar chibai an bûk a chháng lêt.

Governor chuan, India ram mipuite duhthusam - mahnia rorel thei, mipui tana thawk, hnam leh sakhuanaa inthliarna awm lohna leh mipuite kuta thuneihna, ram neih theihna tura India danpui duang chhuaktute zah a, hre reng turin mipui a chah a, "Ram hmasawnna atana pawimawh hmasa remna leh muanna Mizoramin a nei hi a lawmawm tak zet. Dan leh thupek kengkawhtu te, tlawmngai pawl, kohhran, media leh mipuite hnathawh a fakawm hle a ni," a ti.

Larsap chuan, ram chhung hmun dangte rualin Mizoram pawhin hma lam hun êng leh hlimawm tak pana ke a pên a beisei tih sawiin, Republic Day chu Mizoram hma lam hun atan leh ram pum tan lungrual taka thawk tura intiam thar lehna nía hmang turin mipui a ngen a ni.

Autonomous district council pathumte hman tur sum pek dan ennawn a nih thu sawiin Larsap chuan, "Kumin aṭang chuan Mizoram Finance Commission rawtna zûlzuiia kalpui tum a ni," a ti a; sum pek dan thar hian ADC pathumte huam chhungah hmasawnna chak zawk a thlen a beisei thu a sawi.

Governor chuan, Mizoram tana thawktu tlawmngai pawl leh kohhran pawl hrang hrang te, thuthar thehdarhtu leh mipuite'n sorkar chungah rinna nghat a, Mizoram hmasawnna tura sorkar hmalakna an ṭawiawmnaah lawm thu a sawi a, "India sorkar an ṭawiawmna nen, Mizoram sorkarin ram tana a hmathlir duhawm takte hi a la hlawhling ang tih ka ring tlat," a ti.

Ngaihtuahna thui lo tak leh pawisak nei loa chetna vanga ram dante palzût a nih chuan zalenna hlu tak leh democracy lungphûm a tlûkchhiat phah thei tih sawiin, Nirbhay Sharma chuan, "Hetiang thil duhawm lo tak laka inveng tura ṭanrual a ṭul," a ti a; India chu ram ral­muang, hmasawn leh ropuia siam turin chak lehzualna pana ke pên a pawimawh thu a sawi.

Aizawla Republic Day lawm­naah hian parade contingent 29-in hnam puanzar chibai an bûk a; chief minister Lal Thanhawla bakah MP, minister, parliamentary secretary, MLA, sorkar official, zirlai leh mipui ṭhahnem tak an tel.

Republic Day lawmna in­khawm Lammuala hman zawhah Raj Bhavan Circular Lawn-ah sawm bikte tan Governor-in thingpui ruai a buatsaih a; he hunah hian Republic Day 2017 puala ‘Governor’s Republic Day Painting Competition’ a tiṭhate hnenah lawmman sem a ni.